Serian deka nyadi sebuah pasar baru ti besai: Manyin
SERIAN: Dua ngagai tiga taun ke deka datai, Serian deka nyadi sebuah pasar baru ti besai berindik ari sekeda pemansang deka dipejalaika ba bagi menua nya.
Menteri Nembiak, Lumba enggau Main enggau Penyerakup, Dato Sri Michael Manyin Jawong madah, pemansang baru ke deka dipejalaika di pasar Serian iya nya ngaga Kompleks Opis Endur Bejalaika Pengawa Bagi MenuaSerian, Palan Konfren Serian enggau Pasar Baru Serian.
“Kompleks Opis Endur Bejalaika Pengawa Bagi Menua Serian, Palan Baum Serian enggau Pasar Baru tu deka digaga ba bidang tanah pemesai 168 ekar. Ari pemesai nya (168 ekar) urung 33 ekar deka endur ngaga Kompleks Opis Endur Bejalaika Pengawa Bagi Menua Serian, Palan Konfren Serian.
“Lalu kelebih nya deka endur ngemansangka urung 240 unit rumah kedai enggau 500 unit kandang genturung pendiau. Tu nyadika bandar Serian nyata amat dikemesaika.
“Enti semua nya udah tembu magang ila, kitai arap bendar dua ngagai tiga taun ke deka datai Serian deka nyadi pasar baru ke besai, laban naka ke diatu semina urung 200 rumah kedai, lalu enggau penembu 240 unit enggau 500 unit nya ila, Serian ulih nyadi pasar besai,” ku iya.
Manyin mansutka pekara nya dalam aum pengarang berita Pesta Birumuh ke diatur ba bilik Aum Opis Pelilih Serian ditu, kemari.
Iya madahka pengawa ngepunka tiga projek pemansang nya deka dipenyadika nyerumba Pesta Birumuh ke diatur kena 1 April ke deka datai tu.
“Nyerumba Pesta Birumuh kitai deka nasih tanah Kompleks Opis Endur Bejalaika Pengawa Bagi Menua Serian, Palan Konfren Serian enggau Pasar Baru Serian, ti deka dipenyadika Kepala Menteri Datuk Amar Abang Johari Tun Openg.
“Aku arap bendar maya tu ila YB Kepala Menteri deka madahka sekeda projek tambah ungkup Bagi Menua Serian,” ku iya.
Nitihku Manyin projek Kompleks Opis Endur Bejalaika Pengawa, pualan konfren enggau rumah kedai sereta projek genturung pendiau nya deka dikemajuka Borneo Development Corporation (BDC).
Kelimpah ari nya, Manyin madahka pasar Serian mega deka berubah berindik ari kena pansa projek Pan Borneo.
“Projek Pan Borneo mansa Serian, nya alai roundabout mit ba Serian ditu, ila deka deka digaga flyover dia,” ku iya ti enda ngenang silik pasal pekara nya.