STU setujuka chara belajar, ngajar Jaku English ‘online’
Taja pia Presiden STU minta piak bekaul patut mutarka dulu penanggul arus internet ba kandang menua pesisir
SIBU: Serakup Pengajar Sarawak (STU) nyambut manah tauka setuju chara ngajar enggau belajar baru Jaku English nengah chara ‘online’ lalu lebih numpu ngagai nembiak ba menua pesisir.
Tang Presiden STU, Jisin Nyud madah, pemujur pekara nya engka tusah dijapai di Sarawak, lebih agi ba kandang menua pesisir ke bepenanggul ba arus internet.
Kebuah pia, ku iya perengka internet sereta isu-isu bekaul enggau arus penyambung patut diputarka dulu sebedau bejalaika program chara online.
“Bala pengajar sigi nadai penanggul bejalaika tanggungpengawa chara online nyema sekula bisi arus internet, perengka guna enggau infrastruktur ke menyana,” ku iya.
Jisin madah munyi nya lebuh nimbal penerang dipansutka Menteri Pelajar, Datuk Seri Mahdzir Khalid apin lama ke udah iya nya Cambridge Accessible Tests (CATs) deka dipejalai lalu numpu ngagai nembiak
Bala pengajar sigi nadai penanggul bejalaika tanggungpengawa chara online nyema sekula bisi arus internet, perengka guna enggau infrastruktur ke menyana. Jisin Nyud Presiden STU
menua pesisir.
Khalid madah, program pemungkal deka bepun ujung taun tu mungkur urung 40 buah sekula primari enggau sekondari ba menua pesisir lalu dipelaba deka dipejalaika penuh dalam setaun dua ke deka datai.
“STU endang ngelaluka pengawa manah digaga semua piak dalam ngemansangka jaku English lebih agi ba nembiak ba sitak menua pesisir baka CATs tu. Tang chara baru nengah chara online nya engka tusah deka dipejalaika ba Sarawak lebih agi ba kandang menua pesisir.
Ambika chunto, ku Jisin, naka tu guru kelas patut ngemasuka penerang pasal penatai nembiak ninting hari nengah chara online lalu mayuh pengajar mutmut laban mayuh awak sida tebasau ketegal arus internet kelalu lubah.
“Pengawa nepu penerang nya enda lama asal arus internet manah sereta laju,” ku iya seraya madah pengajar deka tusut runding enti semua nya deka nitihka atur ari Opis Menteri Pelajar, Opis Pelajar Nengeri, Opis Pelajar Pelilih enggau sekula.
Iya madah, nyema penerang nya nadai diterima piak ke bekaul, bala pengarat tu deka nerima jaku tangkan sekalika nengah mesej, kangau telefon tauka e-mel.
“Taja pia, kitai enda ulih nyalahka sapa- sapa laban semua orang bela deka ngereja pengawa sida nitihka jam ke udah ditetap. Kitai pan enggai meda pengajar nyau sakit ketegal kelalu tusut runding ngereja pengawa tu.
“Naka tu, program nengah chara online enda ibuh digaga ninting hari laban asil iya tentu ngasaka atu. Putarka dulu penanggul internet sebedau kitai berundingka program chara online tu,” ku iya.