Awang Tengah bejadi POBF Tanjung Manis
TANJUNG MANIS: Menteri Pengatur Pengeraja Asal enggau Rampa Menua Kedua ke mega nyadi Menteri Industri enggau Pemansang Pengawa Dagang enggau Puku, Datuk Amar Awang Tengah Ali Hassan bejadika perengkaguna nyimpan Minyak Sawit Mata ( POBF), Tanjung Manis Bulkers Sdn Bhd ba Bandar Baru Tanjung Manis ditu kemari.
POBF endang industri bepelasarka kelapa sawit keterubah ba Kluster Industri Minyak Sawit (POIC) Tanjung Manis.
Perengka guna beungkus RM70 juta nya bepun digaga Tanjung Manis Bulkers Sdn Bhd, begulai enggau Ejensi Pemansang Pengawa Kayu Sarawak (PUSAKA) Capital Group enggau KTS Group, lalu PUSAKA Capital Sdn Bhd tu anak kompeni PUSAKA.
Nengah pengawa bejadi POBF nya, Tanjung Manis Bulkers Sdn Bhd sedia bejalaika pengawa lalu pekara ke beguna amat, iya deka nyadi penyungkak pemansang industri minyak sawit lebih agi ba wilayah tengah Sarawak.
Perengka guna besai POBF nyengkaum 16 unit tangki penyimpan lalu ulih muat maksimum 64,000 tan metrik ungkup tuju eksport.
Kompleks tu mega disikap enggau makmal pansik, tangki penyimpan minyak, dandang (boiler), pam, paip jalai minyak, blok pengatur pengawa enggau ke bukai.
Projek infrastruktur POIC Tanjung Manis diatu udah tembu lalu deka ngelaluka orang dagang ari dalam enggau luar menua beranakka puku ditu.
Enda lama agi, POIC mega deka muka kilang penapis ke ulih muat kapasiti 1,200 tan metrik sehari, industri petro kimia, industri oleo-kimia sereta ke bekaul enggau industri bepelasarka pengawa betanam betupi.
Tu deka muka jalai dikena ngemansangka mayuh projek bukai baka Projek Minyak Sawit Bersepadu (IPOP) ke ngembuan 31 ekar pemesai, Light Industrial Park ungkup petro-kimia 159 ekar pemesai, oleo-kimia enggau industri ke bekaul (LIPPOR) kelimpah nyikap projek ke bisi diatu baka Projek Jeti Minyak, Gas enggau Kimia ke ngembuan 7 ekar pemesai (Jeti MGK) enggau Oil Central Distribution Terminal (CODT) ke bisi 30 ekar pemesai.
Rambau bejaku ba pengawa nya, Menijar Besai PUSAKA Datu Sarudu Hoklai madah, tu endang sebengkah ari pengawa PUSAKA dikena ngiga penatai pemisi baru bepelasarka pengawa ngemansangka kelapa sawit.
“POIC Tanjung Manis endang sebengkah projek keterubah ba sitak tu ke ulih nangkup peminta sektor betanam betupi, nyadi kitai meri terima kasih ngagai piak opis menteri laban udah meri sukung nyentuk ulih numbuhka POIC tu.
“Kitai ngarap terus nerima sukung ari piak industri, laban perengka guna ke digaga tu endang ungkup semua piak,” ku iya.
Sama bisi datai Ketuai Pemesai Eksekutif KTS Dato Henry Lau Lee Kong enggau Menteri Muda Pemansang Industri (Puku enggau Promosyen) Datuk Julaihi Narawi.