Forum ‘NCR: The Hidden Truth’ DANI udah digulu 40 iku
KUCHING: Institut Bansa Dayak (DANI) udah ngatur forum keterubah sida berambaika leka jaku ‘NCR: The Hidden Truth’ kena Hari Enam nyin tadi, ke digulu 40 iku.
Ba forum nya, ex-Pemesai Opis Tanah Enggau Servei bekunsi pasal Undang- Undang Tanah, enggau chara mutarka isu tanah, seraya tuai rumah ari Pantu bisi bejaku pasal ngenegapka kuasa komuniti, ti ngembuan peneleba mutarka kes tanah ba kort.
Pengempu tanah Cobbold John mega bisi bejaku pasal bekenaka strategi bank tanah Hak Adat Bansa Asal (NCR), pekara wang ba tanah NCR sereta baka ni bansa Dayak ulih nyadi kaya raja ngena tanah NCR sida.
Batang randau forum tu fokus agi ngagai pekara praktikal, betimbal randau ari ke semina bejaku aja,lalu berat agi ngiga mutar tauka resolusyen ba penanggul.
DANI udah merambu deka nampung baru forum ke sama ngagai menua pesisir enggau pasar ke bukai. Forum udah tu ila deka diatur ba Telang Usan, Miri kena 15 April, ari pukul 8 pagi nyentuk 4 lemai. KUCHING: Genturung Pendiau Semaba di Jalai Batu 4, ditu nyadi palan ketrubah endur World Vision Malaysia (WVM) Foundation ngatur program, One Goal ‘ Eat Right to Play Right’ ke deka ngajar urung 60 iku anak mit ari genturung pendiau nya bemain bol sereta npekara bekaul enggau pemakai ke bepengerai.
Chairman Majlis Perbandaran Padawan (MPP) Lo Khere Chiang madah, WVW Foundation ngarapka program keterubah tu tau mai ubah ke besai ngagai bala anak mit di genturung pendiau nya.
“Aku pechaya kitai ulih mai ubah sereta penemu ngagai bala nembiak ke diau di genturung pendiau nya, ngaga pengawa ke menyana, sereta anang sesekali malut diri empu enggau pengawa gian dadah.
“Nya alai, pengawa WVM Foundation tu sigi diperansang laban kem tiga hari tu ukai semina ngajar nembiak bemain bol, tang mega meri sida iya penemu pasal pemakai ke manah enggau pengerai ngambika bala nembiak tu ulih nyadi rayat Malaysia ke beguna sereta nyeliahka diri ari ngereja semua pengawa ke salah,” ku Lo.
Program One Goal ‘Eat Right to Play Right’tu mega diatur nengah kerejasama enggau Zurich Insurance enggau Takaful Malaysia Berhad, Gerempung Main Bol Malaysia (FAM), Federasyen Main Bol ASEAN (AFC) ke bela disukung MPP enggau Agensi Anti-Dadah Kebangsaan (AADK) pampang Sarawak.
Sebedau nya, Ketuai Pemesai Eksekutif WVM Foundation, Terry Leong madah ari ripot statistik nembiak mit di Malaysia kurang makai pemakai ti manah ke pengerai, seraya bechuntoka sebengkah lumba enggau main, ke alai bemain bol ukai pilih keterubah bala anak mit di menua tu (enda baka di Eropah), ke bisi bekaul enggau pemakai ke enda setipak.
“WVM beratika anak mit, lalu kami mega ngelala sereta nemu penanggul ke ditapi anak mit di Malaysia, (enda makai pemakai ke setipak) sekalika ketegal enda chukup pemakai tauka makai kelalu mayuh.
“Nitihka statistik nasional, anak mit baruh umur 12 taun, 10 peratus ari anak mit kitai enda chukup makai pemakai ke bepengerai sereta kelalu gemuk (obesiti), 50 peratus ke ari baruh umur 12 taun nya kelalu gemuk,” ku iya seraya madahka 50 peratus rayat Malaysia, ngembuan tubuh ke kelalu berat bepelasarka ripot ari Opis Menteri Pengerai Malaysia.
Antara pemerat One Goal Malaysia ku Leong, deka mutarka penanggul tu.
“Nya kebuah kami milih pengawa bemain bol, laban tetiap iku anak mit rindu bemain bol,” ku iya.
Nengah bemain bol nya deka nyadi pelasar alai ngajar sereta ngenataika jaku lalau pasal pengerai ngagai anak mit, ku iya.
“Begempung enggau Zurich, kami WVM nerima geran dalam kandang 4 taun tu ari Zurich, ke alai kami ngajar anak mit bemain bol nyengkaum ngajar anak mit pasal pemakai ti manah ke pengerai.
Ngenang pasal program nya ke udah diatur sida di Sabah, bisi 12 komuniti nyereta program nya lalu sekumbang program nya dipejalaika, anak mit udah nemu pasal pekara bekaul pemakai ti manahka pengerai, ku iya.
Berindik ari nya ku Leong, program ke terubah tu diatur ba Genturung Pendiau Semaba , ke alai urung 30 jurulatih deka meri latih bemain bol ngagai bala nembiak mit ari genturung pendiau nya, berengkah kemari (pagila hari Lima),ke diatur pengelama tiga hari berunggu.
“Jurulatih tu deka ngajar nembiak mit bemain bol, lalu kami mega deka ngajar sida iya pasal pemakai ti manah ke pengerai enggau makai chara pemakai ke bepengerai,” ku iya kelimpah bejuraika pekara seranta ti bela meri empas ba nembiak mit .
Nangkan nya, Ketuai Brand Marketing and Communications, Zurich (ke ngembuan Indu Opis di Switzerland), Yee Shiao Fong madah, sida berasai gaga endar ati laban ulih bekerejasama enggau WVM Foundation.
Nengah Program, One Goal ‘Eat Right to Play Right’ ke bekerejasama entara Zurich Insurance enggau Takaful Malaysia Berhad sereta One Goal Malaysia, Zurich komited meri belanja sepenyampau RM4 juta ari taun 2015 nyentuk 2018 (RM1 juta setaun)dikena mutarka pekara bekaul enggau pemakai ke enda setipak.
WVM Foundation tu sebuah gerempung Kristian ti ngemerat nembiak mit enggau ruang bilik ke seranta.
Sama bisi enggau ngulu aum media nya, Sapit Chairman MPP, Dato Ahmad Ibrahim, Ketuai MPP, Andrew Joris, enggau Sapit Direktor AADK, Devan anak Arup.