Dipelaba urung 8,000 iku datai ngulu Pesta Birumuh kena 1 April

SERIAN: Pengatur Pesta Birumuh melabaka urung 8,000 iku orang deka datai ngulu pengerami nya ke deka diatur ba Kompleks Lumba enggau Main Serian, kena 1 April tu.

Menteri Nembiak, Lumba enggau Main sereta Penyerakup, Dato Sri Michael Manyin Jawong madah, taun tu ke-4 kali Pesta Birumuh diatur lalu deka dipenyadika Kepala Menteri Datuk Amar Abang Johari Tun Openg.

“Pesta Birumuh ti ukai semina ungkup raban bansa Bidayuh aja tang kami ngelaluka semua raban bansa Iban, Orang Ulu, Melanau, Melayu, China enggau ke bukai sama datai ngagai pengerami tu.

“Kami melabaka urung 8,000 iku orang datai ngagai Pesta Birumuh lalu penyampau pesereta ke ngambi bagi ba program Culture Parade urung 1,500 iku pesereta ti ngena ngepan asal bansa,” ku iya.

Manyin mansutka pekara nya dalam aum pengarang berita Pesta Birumuh 2017 ke diatur ba bilik aum Opis Pelilih Serian ditu, kemari.

Dulu ari nya Manyin nyadi chairman aum ke penudi pasal Pesta Birumuh Ke-4.

Sebedau tu Pesta Birumuh diatur dalam taun 2009 ke udah dipenyadika Pehin Sri Abdul Taib Mahmud maya ke nyadi Kepala Menteri; 2011 dipenyadika Menteri Besai Datuk Seri Najib Tun Razak enggau 2015 dipenyadika Kepala Menteri Datuk Patinggi Tan Sri Adenan Satem.

Pesta Birumuh iya nya sebengkah pengerami ke besai reti ngagai raban bansa Bidayuh, ti sebaka enggau pemesai reti Gawai Dayak di nengeri tu sereta Pesta Keamatan di Sabah.

Ba raban bansa tu, Pesta Birumuh diatur dikena ngayanka pengaga ati ngagai asil dalam betanam betupi ke diulih tang mega dikena negap sereta ngetanka adat enggau main asal.

Pesta Birumuh ke diatur Dayak Bidayuh National Association (DBNA) bechairmanka Residen Bagi Menua Serian Johnathan enggau Datu Ik Pahon ke nyadi Sek- retari Mendam Opis Dagang Temuai, Seni enggau Main Asal ti mega nyadi Presiden DBNA.

Nitihku Jonathan, kena 31 Mac deka diatur belatih penuh lalu semina kontigen dipinta datai sampal datai.

“Maya belatih penuh kena 31 Mac sehari sebedau Pesta tu amat nyadi kitai minta semua kontigen datai magang dikena ngunukuka pengelanchar program nya diatur kena 1 April.

Entara aktiviti ke diatur maya tu ila nyengkaum pengawa pemandang asil betanam betupi, Birumuh Parade sereta Remote Control Boat Race di Tasik Danu.

Nyerumba Pesta tu mega Kepala Mentari Abang Johari diberi basa nasih tanah endur ngaga Kompleks Opis Endur Bejalaika Pengawa Bagi Menua Serian, Palan Konfren Serian enggau Pasar Baru Serian.

Sama bisi dalam aum pengarang berita nya kemari Kaban Kunsil nengeri ( ADUN) Opar, Ranum Mina; ADUN Kedup, Martin Ben enggau kebukai.