HDC,CBM nyain sempekat numbuhka gudang ngaga panel modular di Muara Tebas

FOSHAN, Guangzhou: Opis Pemansang Pengawa Berumah( HDC) nengah kompeni mit ke dikuasa, Smart Housing R & D Sdn Bhd (Smart Housing) nyain sempekat (HoA) enggau sebengkah kompeni di Foshan, Conceiving Board Manufacturing Co Ltd (CBM) ba atur numbuhka gudang ngaga panel modular di Muara Tebas, kemari.

Sempekat nya disain di Gudang CBM Foshan, lalu bela dikemata Kepala Menteri Datuk Amar Abang Johari Tun Openg ke disempulang seraban pemesai ari Opis Menteri Pengawa Berumah enggau Urbanisasi sereta Gerempung Pemansang Reta enggau Pengawa Berumah Sarawak(SHEDA) pampang Kuching.

Nengah sempekat nya,HDC ngempu syer majoriti ba kompeni ke ditumbuh begulai enggau Green Modular R & R Sdn Bhd (Green Modular).

Nitihka penerang ari Abang Johari, pengawa nya ukai semina ngemudah atur mai teknologi CBM ke Sarawak, tang mega ulih ngisi pinta ru- mah peranak Sarawak, iya nya ngaga rumah enggau lengkas nengah rega ke patut.

Sepenemu enggau Kepala Menteri, Direktor Smart Housing Datuk Dr Abang Abdul Rauf Abang Zen ngakun rumah ke ulih diempu jemah ila sigi rumah modular.

“Di Sarawak, rega(rumah) majak niki lalu deka seruran niki ke alai Kepala Menteri( Abang Johari) ba sekeda pengerami suah nerangka kitai patut nyendia rumah ke enda mar.

“Juluk tu ulih dijapai nengah rumah ke digaga chara modular tauka panel ketegal ukai semina ulih ngelimat ungkus ngaga, tang mega ungkus ngaji orang gawa,’ku iya.

Ngenang kaul ke sama, Direktor CBM Chen Yao Ran madah pengawa ngaga rumah nguna produk modular enda begunaka mayuh orang gawa.

“Baka ke suah, projek berumah 80 peratus diadu ba palan berumah lalu 20 peratus di gudang.

“Pinta ba orang gawa deka nyengala nurun lalu tu ulih nambah penengkeman kereja iya nya ari sukut logistik ba perengka berumah ketegal produk kitai lempung sereta mudah diangkat,”ku iya.

Abang Johari mega madah kelimpah ari ngaga rumah, begunan pan ulih digaga nguna chara modular CBM.

“Aku pechaya makit ungkup panel modular sigi bisi lalu deka mai penguntung ukai semina ba pengawa berumah, tang kitai mega ulih nguna chara tu ngaga sekula enggau spital dalam timpuh ke pandak sereta mai pemaik ngagai rayat kitai,”ku iya.

Iya mega ngarap sempekat nya deka mai pemaik ngagai kompeni ke bisi kaul enggau pengawa berumah lalu meri peluang ngagai sida ngelaku produk ke menua luar.

Abang Abdul Rauf enggau Mohd Yusuf Ona ngarika Smart Housing ba sempekat nya ke alai CBM diarika Chen enggau Manager Besai Xia Zun Hua.

Pengudah pengawa nyain sempekat, Abang Johari sereta delegasyen bisi ngelawa ngagai palan ngaga CBM lalu ngemata demonstrasyen masang panel modular.