JPN mujur nerima 40 iku peminta ngaga dokumen pengelala baru di Engkilili
SKRANG: Palan Servis Barisan Nasional (BN) DUN Engkilili nengah kerejasama Opis Pengerejista Bansa (JPN) sereta Kort Mindah Kin Kitu bisi ngatur ‘Hari Bersama Pelanggan’ ba Dewan Dr Johnical Rayong Ngipa di Skim Skrang ditu.
Program nya ke tembu kemari mujur nerima timbal ke chukup manah ari mensia mayuh ukai semina ari konstituensyen Engkilili tang mega ari Lubok Antu, Betong engga Sri Aman.
Kaban Kunsil Nengeri (ADUN) Engkilili Dr Johnical Rayong Ngipa maya dirandau madah, penemu ti mai raban JPN begulai enggau kort mindah kin kitu nya laban nemu agi bisi peranak Engkilili nadai ngembuan surat pengada enggau tingki.
“Nya kebuah, aku nengah Palan Servis DUN Engkilili ari Parti Rakyat Bersatu (UPP) berunding mai ejensi perintah kitu ngambika ulih lengkas nyaup sida ke nadai dokumen pengelala,” ku iya.
“Asil ari perati aku sekumbang ejensi tu ditu dia aku meda timbal ke chukup manah lalu sida ke datai minta ukai semina ari DUN tu tang mega datai ari Lubuk Antu, Betong enggau Sri Aman.
“Tu endang enda disadang lalu kami ngarapka prpgram ke sebaka ulih diatur baru dudi hari lalu aku nyukung penuh pengawa tu ngambika ulih mantu rayat kitai ke patut bisi dokumen pengelala,” ku iya.
Tambah mega, genap rayat ke diau ba menua tu endang patut bisi dokumen pengelala laban nya tiket dikena sida mindah, minta bantu ari perintah sereta masuk besekula enti umur udah chukup.
“Tang pekara ke ngenyinu taja nemu pemesai guna dokumen pengelala agi bisi enggai kiruh sereta enda minta ukai semina ungkup diri empu tang mega ngagai bala anak nujungka sida enda ulih ngasaika penyamai baka peranak menua tu ke bukai,” ku iya.
Ngenang silik pasal pekara nya, Dr Rayong ke mega Ketuai Nembiak UPP bisi nyadaka pengasa ati laban bisi orang ke dikelala sereta ditemu nadai dokumen pengelala puntan nguna peluang nya.
“Aku dipadahka sekeda ketuai raban bansa bisi sida ke diselinting patut ngaga dokumen pengelala tang enda datai taja udah dipadah tumu...kitai enda nemu nama kebuah laban pengawa ngerejista diatur ba semak menua diri,” ku iya.
Berebak enggau nya, pengari JPN Eric Douglas nyadaka pengaga ati laban program JPN begulai enggau Kort Mindah Kin Mitu nya mujur nyapai juluk.
Ku iya, program nya endang sebengkah ari program Servis Rama Korporat (CSR) dikena nyaut peransang perintah ke minta ejensi perintah begulai enggau ejensi bekaul datai ngagai rumah panjai ngiga, nyidi lalu ngerejista peranak menua tu ke bedau bisi dokumen pengelala.
“Lalu sehari tu kami mujur ngerejista urung 40 iku peminta baru ke udah dikenukuka piak kort betuaika Dora Undau,” ku iya.
Berebak enggau nya, peminta baru dibaruh sitak pegai Penghulu Gerang Anchih pemadu mayuh minta surat pengada enggau tingki.
Bela datai ngemataka program tu Pemesai JASA Edwin Anchih, Penghulu Betok Tubi, Penghulu Inchang Anchih, Penghulu Francis Empam, Penghulu Briku, bala kaunsilor sereta tuai rumah ba DUN tu.