Eksibisyen enggau Karnival Pemakai diatur nyerumba Miri May Fest 2017
MIRI: Gerempung Pemansik Kraf Jari Tradisional Miri, deka ngatur Eksibisyen enggau Karnival Pemakai Miri 2017 kena bulan Mei tu ila.
Atur program deka ditusun lalu diatur begulai enggau Kaunsil Bandaraya Miri (MBM) beserimbai enggau Miri May Fest 2017 ke deka diatur pengelama 17 hari bepun 5 ngagai 21 Mei, bepalan ba Dataran Kipas Miri.
Chairman pengatur Alex Chu madah, tuju karnival enggau eksibisyen diatur dikena meransang temuai datai ke Miri lalu deka ngaga nya nyadi program ninting taun.
“Taun tu, Miri udah ngerami ulang taun ke-12 nyadi sebuah mengeri besai lalu nyema suba, aktiviti baka tu semina disambut gerempung diri empu tang taun tu, kami deka ngatur pengawa ke nyelai.
“Kitai patut ngagai sekeda ubah dikena matak mayuh temuai datai ke Miri lalu ngambi bagi rambau pengerami Mai Miri tauka dikumbai Miri May Fest, enda lama agi.
Pengerami Miri ku iya, patut bisi ketuai pengatur dikena ngenampakka agi nama Miri lalu nempa menua tu nyadi sebuah mengeri besai alai nemuai ke mujur, ngerindang nengah mayuh program baka Eksibisyen enggau Karnival Pemakai Miri 2017.
Eksibisyen nya ila deka ngelakuka mayuh aktiviti, setipak enggau juluk pengatur, deka meransang temuai datai ke Miri, seraya bekunsi penenang sentang sesebengkah adat.
Pia mega ku iya, Eksibisyen enggau Karnival Pemakai Miri 2017 mega deka nyendiaka sebengkah pelasar baru dikena mantu raban nembiak ngepunka pengawa dagang sida.
Bansal pemakai enggau eksibisyen diatu dibuka ngambika ulih disuawa. Pengawa tu dibuka ngagau semua anak Sarawak sereta kompeni ke keran ngambi bagi.
Gerai tu deka dibuka belabuh pukul 4 lemai nyentuk 11 malam. Sepanjai pengerami tu diatur, bisi dua pekit deka diatur dibuka ngagai semua bansal bejual pemakai ke ngambi bagi iya nya ‘Bansal Pemadu Manah’ enggau bansal ‘Pemakai Pemadu Nyamai’.
“Kelimpah nya, pengatur mega deka ngatur sebengkah program enggau aktiviti pemerindang genap ujung minggu sekumbang pengerami nya.
“Kami mega ngarapka sekeda gerempung deka ngambi bagi ba program tu ulih mandangka pengelandik diri ngambika pengerami tu dipeda richah sereta nyapai juluk,” ku iya.
“Berebak enggau nya, kami mega ngarapka (MBM) deka bekerejasama enggau kami ngambika pengerami nya dipeda bisi reti sereta nyadi pengerami pemadu manah rambau Miri May Fest,”ku iya.
Kenu ku Chu, barang sapak ke bisi ati nyereta program tu ulih peda penerang ba akaun Facebook – ‘ Miri Food & Exhibition Carnival 2017’ lalu penerang silik ulih ditanya terus ngagai Alex Chu ngena lumur telefon 019-8558582 tauka Don Lai (012-8071555).