Kemayuhka program main asal maya Pengerami Mantar Gawai
Laban nya ulih ngerichahka agi pengerami ti diatur
SELANGAU: Pengerami Mantar Gawai Dayak patut mayuh agi disempulang enggau program mandangka main asal Dayak ngambika semampai dipeda belama.
Ambika banding kita tau mantaika pengawa baka beramban, bekuntau tauka main asal ke bukai maya ngatur pengerami mantar gawai. Datuk Joseph Entulu Belaun Menteri Ba Opis Menteri Besai
Menteri Ba Opis Menteri Besai Datuk Joseph Entulu Belaun madah, program nya mega tau bendar ngerichah agi pengerami ke diatur kelimpah bela dikerindu semua raban bansa.
“Ambika banding kita tau mantaika pengawa baka beramban, bekuntau tauka main asal ke bukai maya ngatur pengerami mantar gawai.
“Pengeransing kitai deka nyempulang program baka tu ulih ngembing rebak baru nemu bagi main asal bansa diri empu,” pia ku iya madah.
Iya bejaku munyi nya maya bejadi Pengerami Makai Lemai Mantar Gawai Dayak Pelilih Selangau ba Balai Mensia Mayuh Selangau, empai lama tu tadi.
Pengerami nya diatur begulai komponen Parti Barisan Nasional (BN) iya nya Parti Pesaka Bumiputera Bersatu (PBB), Parti Rayat Sarawak, Parti Sa’ati Rayat Sarawak (SUPP) enggau Parti Progresif Demokratik (PDP).
Kaban Parlimen (MP) Selangau nya mega madah, ajat ke dibantai meseti nitihka ajat iya ke amat tauka endang ke betul, pia mega sepil enggau patah leka jaku Iban disebut enggau chara ke betul.
“Kitai semua anang enda ngintu tiap bengkah main enggau pengawa lama Iban ngambika semampai tegut nyentuk ke jemah ila,” ku penemu iya.
Maya tu mega Entulu meri puji ngagai komiti pengatur pengerami nya laban pemujur sida ngatur program nya mandangka penyerakup ke likun dalam semua parti komponen BN.
Nyerumba Gawai Dayak deka disambut enda lama agi, iya ngelalau bansa Dayak semampai nyaga pengelikun diri.
“Anang bebaika kerita tauka mutusikal enti pala udah sebening.
“Deriba enggau bejimat ngambika kitai datai ba endur ti dilawa sereta gaga ati ngintu Gawai Dayak begulai enggau diri sebilik, kaban belayan,” ku iya madah baru.
Maya pengerami nya, mensia mayuh ke bisi datai dipandangka macham bengkah main enggau pengawa lama baka Ngajat, Beramban, Ngirup Ai Pengayu kelimpah program ke bukai baka tikit benasit sereta panggau pemerindang.
Sama bela datai maya tu iya nya Sekretari Politik Menteri ba Opis Menteri Besai Adriana Chumang Nyambung, Pemesai Pelilih Selangau Inting Nyami enggau Chairman Pengatur Pengerami Jirum Jurampang sereta bala bukai.