Kerejasama ari serakup BN beguna amat dikena napi pemar ba PRK Pujut

KUCHING: “Pujut ukai penuduk ti ulih dibeli ngena duit,” ku Presiden Parti Sa’ati Rayat Sarawak (SUPP) Datuk Dr Sim Kui Hian ti nguji madahka Barisan Nasional (BN) deka napi pemar besai.

BN deka ngirai chalun iya ba penuduk Kunsil Bepilih Nengeri (DUN) Pujut pengudah penuduk nya puang berindik ari Dr Ting Tiong Choon ditingkil ari nyadi Kaban DUN kena 12 Mei tu tadi.

Dr Sim madah pengeransing enggau kerejasama rat dalam serakup BN endang beguna enda nyema dekaka penuduk nya dipenggi BN baru pengudah nyebut SUPP ari baruh pegai iya nadai ngembuan belanja ti mayuh.

“SUPP ari baruh pegai Dr Sim chukup merinsa. Menteri Pengawa Berumah empu bedau bisi rumah, aku agi diau begulai enggau indai,” ku iya madah ngagai pengarang berita rambau pengawa nyuaka chek geran Projek Mit Pemansang Menua Pesisir (MRP) ngagai sekeda serakup di indu opis SUPP, kemari.

Dr Sim ke mega Menteri Kaunsil Kandang Menua enggau Pengawa Berumah madah, piak sida udah nganjung nama ari parti nya ngambi diperunding bediri minta pilih di Pujut ngagai Kepala Menteri Datuk Amar Abang Johari Tun Openg.

Taja pia, iya enggai madahka penyampau nama ti dianjung.

Nitih ku iya, Pujut tu penuduk asal SUPP lalu barang sapa ti ngasaika diri ulih diperunding bediri minta pilih ngena tikit BN sebedau tu patut nganjung nama ngagai iya lalu nyemilik SUPP.

Rambau Pengawa Bepilih Nengeri ( PRN) 2016, penuduk Pujut dimenang Dr Ting ari Parti Tindakan Demokratik ( DAP) pengudah ngalahka tiga iku ti berebut enggau iya - Datuk Hii King Chiong (BN), Jofri Jaraiee (PAS) dan Fong Pau Teck (Ngatika Diri).

Taja pia, Dr Ting pada 12 Mei ditingkil pengudah Menteri Wang Kedua Dato Sri Wong Soon Koh mantaika usul ngagai iya ti madahka iya bisi ngembuan peranak Australia.

Majoriti Kaban DUN rambau Aum Kunsil Nengeri ( DUN) ti dicharimanka Datuk Amar Mohd Asfia Awang Nassar nyukung usul nya ngujungka Dr Ting ditingkil.

Kelimpah ari SUPP, Abang Johari apin lama ke udah madahka iya udah nerima lis nama ari Parti Rakyat Bersatu (UPP) ti ngining bediri minta pilih di Pujut.

Komiti Pengawa Bepilih ( SPR) netapka Pengawa Bepilih Mit ( PRK) deka diatur kena 4 Julai, lalu hari ngantung nama 20 Jun.

Ngelansa pasal MRP, Dr Sim madahka sitak menua ti diarika BN benasit endar laban agih belanja kena bejalaika projek- projek mit sereta mantu nampung belanja aktiviti serakup ti direjista.