Chalun BN PRK Pujut deka ditemu pengudah baum
Aum BN bekaul enggau pekara tu deka diatur enda lama agi iya nya sebedau hari ngantung nama
KUCHING: Kepala Menteri Datuk Amar Abang Johari Tun Openg ngenuku diri udah nerima nama-nama chalun ke bepenau bediri ba Pengawa Bepilih Mit (PRK) Pujut kena 4 Julai 2017.
Abang Johari ke mega Chairman BN Sarawak taja pia nadai madahka rintai nama sida nya, tang semina madahka udah nerima sereta deka dibai ngagai aum Barisan Nasional ( BN) enda lama agi.
“Au, aku amat udah nerima rintai nama chalun ungkup PRK Pujut. Agi panjai tim- puh nya, sereta udah diterima, semina aku bedau ulih madah ngagai kita (pengarang berita) laban tu deka dulu dipejurai dulu ba aum BN,” ku Abang Johari rambau aum media pengudah pengawa nyuaka geran MRP ngagai masjid sereta surau ba sitak Satok di Palan Servis PBB Satok, ditu kemari.
Lebuh diansak nyaut ni maya PBB sereta BN deka ngaga aum BN nya, ku iya (dalam jaku tundi iya), “maya sebedau ngantung nama ila”.
Lebuh ditanya baru enti sema chalun ke dalam ati iya, iya nya chalun terus BN tauka endang chalun BN empu, ku iya:
“Aku agi berunding pasal pekara nya, meda gaya ila,”ku iya.
Abang Johari ti mega nyadi Chairman BN renggat menua Sarawak taja pia, madahka Pujut tu endang sitak kubu Parti Tindakan Demokratik (DAP), seiti pengawa ke enda muntang ba BN, ku iya.
“Sitak Pujut nya sigi kubu DAP, reti nya, iya seiti tanggung pengawa ke berat, ulih tauka enda, kitai meseti napi pemar nya.
“Taja pia, BN engka ulih menang dia, enda muntang tang enti kitai bekereja kuat, nama kebuah enda ulih, utai ke tusah tau nyadi senang, asal chalun nya enda tau enda rayat Malaysia” ku iya seraya madah pelin ba Pujut nya enda ulih disamaka enggau Tanjung Datu laban sitak Tanjung Datu (di Lundu) endang kubu PBB.
PRK Pujut deka digaga kena 4 Julai lalu pengawa ngantung nama diatur 20 Jun tu.
Kerusi Pujut puang berindik ari penyandang sitak nya, Dr Ting Tiong Choon ditingkilka nyadi Kaban Kunsil Nengeri ( ADUN) Pujut, laban dipadah bisi ngembuan dua status peranak menua iya nya Malaysia enggau Australia.
Ba Aum Kunsil Nengeri (DUN) tu tadi, ba hari keterubah aum nya, Menteri Wang Kedua ti mega ADUN Bawang Assan, Dato Sri Wong Soon Koh mantaika mosyen Dr. Ting enda ulih nyadi ADUN ba sitak nya laban bisi megai status peranak menua kelimpah kala dikenukuka bankrap.
Taja pia, Dr. Ting semina ditingkilka nyadi kaban ADUN bepelasarka iya megai status dua peranak menua lalu nadai besangkut paut enggau bankrap.
Au, aku amat udah nerima rintai nama chalun ungkup PRK Pujut. Agi panjai timpuh nya, sereta udah diterima, semina aku bedau ulih madah ngagai kita (pengarang berita) laban tu deka dulu dipejurai dulu ba aum BN. Datuk Amar Abang Johari Tun Openg Chairman BN Sarawak