Palan dagang baru di Bandaraya Kuching deka disikap menyana agi
KUCHING: Sekeda sitak di Bandaraya Kuching deka terus dikemansang nyadi palan dagang baru lalu disikap enggau perengka guna infrastruktur moden ngambi meri servis ke menyana agi.
Kepala Menteri Datuk Amar Abang Johari Tun Openg madah diatu, dalam sejarah Bandaraya Kuching, dua buah sitak ke diperatika berat endar di Kuching, ungkup pengawa dagang iya nya Gambir Street, Market Street enggau Padungan.
“Nya nitihka sejarah Bandaraya Kuching, tang ketegal pengawa dagang kitai majak nambah, perintah bisi perambu timpuh panjai deka gaga pemansang baru ba sitak tu (baruh bungkur sitak Satok).
“Rumah-rumah kedai ke lama enda direrak laban sekeda ari palan nya bisi ngembuan sejarah tang deka disikap enggau perengka guna ke baru.
“Tu dalam Perambu Timpuh Panjai iya nya seiti program dikena ngemansangka sekeda sitak , lalu ngujungka palan tu ila nyadi palan dagang baru ke disikap enggau perengka guna moden seraya meri servis ke menyana agi,” ku iya.
Abang Johari ti mega nyadi Kaban Kunsil Nengeri (ADUN) Satok madah pemisi palan sereta disedia enggau perengka guna moden, ulih matak pemeranak puku kitu lalu ngangkatka industri servis.
“Pekara tu bisi bekait enggau pemansang timpuh panjai kitai, iya nya Ekonomi Digital sereta pemansang LRT,” ku iya.
Iya madah munyi rambau aum media pengudah pengawa nyuaka geran MRP sereta pemeri Aidilfitri ke DUN Satok ngagai urung 13 buah masjid enggau surau ba Satok di Palan Servis Satok (PBB) ditu, kemari.
Kelimpah ari nya, iya madahka rumah kedai ke lama deka dikemanahka baru sereta agi mengkang bepelasarka pendiau lama.
Sitak lama nya mungkur Jalai Hj Taha, Jalai P. Ramlee enggau Padang Pasir, ku iya.
“Semua pemansang tu agi ba renggat perambu. Rumahrumah lama agi mengkang ditanka, bala pelin Singapore, bisi sekeda dikemansangka, lalu bisi sekeda diteju,” ku iya.
Abang Johari ti mega Menteri Pemansang Mengeri madah baka sekeda sitak, Padang Pasir, Stor JKR, Brooke Dockyard, India Street sereta sekeda sitak bukai agi dipenggi perintah nengah Serikat Amanah Satok.
“Nya alai, penembu Palan Dagang ba Bandaraya Kuching nya ila deka nyadi sebuah palan dagang kelimpah ari Padungan, MJC, enggau Kota Sentosa. Tang palan dagang tu bisi sejarah diri empu.
“Dalam kandang lima ngagai 10 taun tu ila, kitai deka beratika sitak dagang tu betukar nyadi baru ke bisi kaul enggau pemansang ngaga LRT. Lalu nambah enggau nya mega, ba sitak Satok tu, mayuh bank lalu baka palan servis wang,” ku iya.