Kpg Sg Keluan ulih nyadi ‘inap desa tradisional’
Raban nembiak ari Jipun enggau Eropah madah keran deka bejalaika pansik ba tumpuk pendiau nya
MIRI: Kampung Sungai Keluan ulih nyadi seiti ai rumah ‘ inap desa tradisional’ komuniti Kayan di Telang Usan seriris enggau pengawa perintah ngerichahka agi industri dagang temuai.
Kaban Kunsil Nengeri (ADUN) Telang Usan, Dennis Ngau madahka nembiak palan pelajar tinggi ari Jipun enggau Eropah udah madahka pengeran deka bejalaika pansik ba Kampung Sungai Keluan.
“Tu kelai ti manah ngagai kitai di menua pesisir ngelakuka main asal enggau pemanah rampa menua asal sereta nempa Telang Usan tu nyadi hub-dagang temuai,” ku iya rambau Pengerami Selamat Tepuko (Pesta Ngetau) Kampung Sungai Keluan, apin lama ke udah.
Dennis empu datai ngagai genturung pendiau ngasaika penyamai kesuh angin kampung enggau penulin rampa menua asal ti apin rajai laban pemansang.
“Kitai andal amat enggau pemansut asal menua ti ulih matak penatai temuai ari menua luar sereta ngerichahka agi industri dagang temuai menua pesisir,” ku iya.
Ba pekara bukai, Dennis mega ngelalau peranak menua pesisir terus begulai enggau perinta ngambika peminta enggau peneka sida datai ba piak perintah.
“Kitai ngarap endar komuniti Kayan kelebih agi di Kampung Sungai Keluan tu meri kerejasama rat ngagai perintah ngambika perintah ulih nangkup peminta sida,” ku iya.
Ngelansa pasal pengerami nya, ku Dennis iya ulih nerenakka semangat kerejasama antara peranak sereta ngetanka pengawa asal peturun sida.
Iya mega muji iniasitif ngatur pengerami nya ti ulih matak pulai peranak menua nya ti gawa di mengeri begempuru ngintu Pesta Ngetau.
Berebak enggau pengerami nya, Dennis bisi ngemendarka geran MRP RM10,000 Serakup Sungai Keluan dikena bejalaika aktiviti.
Sama bisi datai Penyanding Penemu Komiti Serakup Sungai Keluan, Jok Jau Evong, Chairan iya, Awit Wan sereta bala bukai.
Tu kelai ti manah ngagai kitai di menua pesisir ngelakuka main asal enggau pemanah rampa menua asal sereta nempa Telang Usan tu nyadi hubdagang temuai. Dennis Ngau ADUN Telang Usan