Bisi 34 iku nembiak Universiti Curtin Malaysia raun ngagai Tekat Ai Bakun
MIRI: Sepenyampau 34 iku nembiak bidang enjinir rampa menua enggau enjinir pengawa berumah enggau sivil, Universiti Curtin Malaysia (Curtin Malaysia) nyereta pejalai raun ngagai Tekat Ai Hidro Bakun enggau kandang taba pengawa berumah di Bintulu, apin lama ke udah.
Rambau di Bakun, bala pelajar bisi awak nambahka penemu bekaul enggau operasyen tekat ai enggau mansutka kuasa nyengkaum alir ai sereta ngambi ai ulih palan kuasa.
Bala sida mega diterangka pasal atur pengawa ngelilihka ai ngagai sungai ninting hari ti beguna dikena ngetanka ekosistem dia.
Pengudah pejalai ngabas ngagai Tekat Ai Hidro Bakun, sida seraban bejalai ngabas taba pengawa berumah Pinnacle Condominiums, kondominium 27 ringkat iya nya antara pemadu tinggi di Sarawak.
Bala pelajar bisi awak belajarka pekara pelin enggau arkitek sebuah begunan eng- gau chara elemen nya dipejalaika ba bidang injinir.
Pelajar Taun Empat ari program Enjinir Pengawa Berumah Enggau Sivil, Aaron Wong Ching Chuan madahka iya betuah endar laban bisi awak ngabas projek besai baka Bakun enggau kondominium.
“Pengawa tu beguna endar meri kelala ti nyata pekara injinir kelebih agi ba pengawa berumah. Iya ngenapka penemu ti dipelajar dalam kelas,” ku iya.
Ketuai Opis Injinir Pengawa Berumah enggau Sivil, Profesor Madya Muhammad Ekhlasur Rahman madahka, penjalai nemuai tu beguna endar ngambika sida meda teori ti dipelajar dalam kelas dikena ba dunya nyata.
“Pekara ti dibantai mayuh dalam industri enjinir tu beguna endar kena nyikap sida enggau penemu kemaya hari sereta ulih nangkup peminta makit kereja,” ku iya.