Pengawa ngusung pangan diri rambau pengerami ulih negutka agi penyerakup

MIRI: Pengawa ngusung pangan diri rambau musim pengerami ulih negutka agi penyerakup kaul antara rayat pupu bansa enggau jalai pengarap.

Kaban Parlimen (MP) Sibuti, Ahmad Lai Bujang madah ambika chunto, pengerami Gawai Dayak diintu bansa Dayak di Sarawak bela dirami begulai enggau bansa bukai.

“Tu mih penyelai hari besai di Sarawak nadai ngira jalai pengarap tauka bansa, pengawa ngusung pangan diri tetap dikemeran sereta diterenak dalam diri peranak Sarawak,” ku iya pengudah ngabang pengerami nerima pengabang Gawai di Rumah Linggie Belaja malam kemari.

Nitih ku iya, taja bulan Ramadan, tu nadai nanggul sida ti megai pengarap Islam ngabang ngagai rumah bala bakih ti ngadaka pengerami nerima pengabang Gawai.

“Pengawa ke bansa tu patut dikemeran laban nengah iya semangat penyerakup bansa ngagai raban bansa ulih diterenak kelimpah kitai ulih mereti sereta bebasaka jalai pengarap enggau adat bansa bukai,” ku iya.

Tambah mega ku iya, bansa Dayak di Sarawak mega mereti sereta bebasaka sida ti megai pengarap Islam lalu sida ngagauka bala bakih Islam datai ngagai pengerami nerima pengabang ti diatur muaka malam.

“Tu seiti kelai penyerakup 1Malaysia ti udah lama dikemeranka di Sarawak, kitai temegah endar rayat Sarawak meretika gaya idup enggau jalai pengarap pangan diri,” ku iya nerang.

Ku iya nampung, nyadi rayat pupu bansa di Malaysia, rayat patut ngetan sereta ngenegapka agi penyerakup nengah pengawa ngabang ba hari besai.

“Pengawa ngusung pangan diri bansa Malaysia ukai semina lebuh ngintu Gawai Dayak aja tang pengawa tu dikemeran maya hari besai ke bukai,” tandu iya.

Ku iya, perintah endang meransang pengawa tu dikemeran sereta ditan kena ngenegapka agi integrasyen nasional antara rayat pupu bansa di menua tu.

“Kitai patut beterima kasih laban awak ngintu semua hari besai di menua tu dalam likun lalu hari besai ukai semina ungkup seiti bansa aja, tang diintu semua orang,” ku iya.