Peranak Skim B Meradong beterima kasih ke pemansang diberi perintah
BINTANGOR: Peranak Skim B Meradong ditu berasai betuah sereta meri terima kasih ngagai penyiru perintah Barisan Nasional (BN) ti udah nyendiaka semua perengka guna infrastruktur ungkup sida di menua nya.
Tuai Rumah Giman Jabu madah, tu nyengkaum projek ngaga jalai belakin ti nyambung Skim B enggau pasar Sarikei sereta Bintangor, ke alai pejalai ngelawa kededua endur tu makin muntang sereta ngelimat jam.
“Kelimpah ari nya, kesemua lapan buah rumah panjai di Skim B Meradong mega udah lama ngasaika bekal elekterik enggau ai beresi.
“Skim B Meradong mega ngembuan sebuah tadika KEMAS, sekula primari, surau, gerija, balai mayuh guna enggau gelanggang futsal,” ku iya nerang seraya madahka rumah panjai sida mega udah nerima bantu ngemanahka rumah ari baruh Opis Menteri Pemansang Menua Pesisir enggau Kandang Menua (KKLW).
Tuai Rumah Giman mansutka jaku tu lebuhka bejaku ba Pengerami Mantar Gawai Dayak diatur Komiti Pe- mansang Enggau Pengelikun Genturung Pendiau (JKKK) Rumah Giman Jabu, Sungai Merujun, Skim B Meradong, apin lama ke udah.
Pengerami tu mega udah dirichah enggau penatai Sekretari Politik Kepala Menteri, Teng Ung Woo.
Ba lansa bukai, Teng dalam jaku iya madahka perintah seruran komited ba pemansang rayat nyengkaum di kandang mengeri enggau menua pesisir nengah pejalai bemacham projek pemansang pulaika pemaik semua rayat.
“Baka ti udah diasaika semua kitai diatu iya nya penyiru perintah ungkup pengelantang rayat,” ku iya.
Teng mega mantaika pen- gaga diri meda pengerichah pengawa ngintu Gawai Dayak di rumah panjai.
“Tentu iya pengerami ngintu Gawai Dayak nyadi pelasar besau nempa penyerakup ti tegap antara semua rayat kelebih agi di Sarawak.
Pengerami Mantar Gawai Dayak JKKK Rumah Giman mega bela dirichahka bemacham ativiti ti narit ati nyengkaum ngajat, karaoke, tanda poco- poco enggau serumpu makai lemai.