Rayat patut seruran meri sukung ngagai perintah BN
Ngambika pemansang ulih terus dipejalai dikena nyungkak tikas pengidup kelebih agi di menua pesisir
KAPIT: Pemansang ke diasaika rayat diatu mengkang ulih ditumbuhka belama nyema perintah Barisan Nasional (BN) semampai disukung rayat.
Kaban Kunsil Nengeri (ADUN) Bukit Goram Jefferson Jamit Unyat madah, sukung ke sebaka mega patut bendar diayanka rayat di Kapit bepun ari sitak nya agi randaka mayuh macham pemansang dikena nyungkak agi tikas pengidup sida.
“Kitai bela meda Kapit agi bepanggai ba saup perintah numbuhka pemansang infrastruktur enggau projek pemansang pengidup rayat ditu,” pia ku iya madah.
Jamit mantaika jaku nya maya bejadi Pengerami Ngiling Bidai 2017 ba Rumah Jawang Kilat, Kampung Yati Jaya, Jalai Bukit Goram, empai lama tu tadi.
Ku Jamit, perintah semampai beratika pengidup rayat nengah pengawa numbuhka pemansang baka Bekal Ka- ran Menua Pesisir (BELB), bekal ai beresi, geran projek mit menua peisir enggau projek betanam baka getah, kelapa sawit tauka iya ke bukai.
“Kelimpah ari nya, kami ke nyadi pengari rayat mega
Kitai bela meda Kapit agi bepanggai ba saup perintah numbuhka pemansang infrastruktur enggau projek pemansang pengidup rayat ditu. Jefferson Jamit Unyat ADUN Bukit Goram
deka suah agi begulai enggau kita ngambika silik agi nemu nama penusah ti bisi nyadi.
“Ari nya, kami deka ngatur singkang berundingka chara ngaga projek ungkup kita,” ku iya madah baru.
Nambahka nya, ku iya, diatu sitak Kapit bisi tim BN ti tegut ke betuaika Sapit Kepala Menteri Tan Sri Datuk Amar Dr James Jemut Masing, Sapit Menteri Pemansang Menua Pesisir enggau Kandang Menua Datuk Alexander Nanta Linggi enggau Kaban Parlimen Ulu Rajang Datuk Wilson Ugak Kumbong.
“Tim tu bela disempulang ADUN Pelagus Wilson Nyabong Igang enggau aku empu sereta dua iku Sekretari Politik Kepala Menteri iya nya Nicholas Kudi Jantai enggau Tapah Ata ti bela ransing gawaka rayat ditu,” pia ku iya nerang.
Ba pengerami nya, Jamit bela ngerahka bantu sepenyampau RM52,000 nengah Program Bantu Rayat ngagai 52 pintu ruang bilik di Kampung Yati Jaya.
Kelimpah ari nya, Raban Indu Kampung Yati Jaya mega diberi bantu sepenyampau RM3,000.
Sama bela datai maya pengerami tu iya nya Sapit Residen Kapit Galong Luang, Pemesai Raban Nembiak, Lumba enggau Main Kapit Jack Janda Pioh, Pemancha Enggi Nyipa, Penghulu Madang Jelani enggau Penghulu Steward Sawing.