Kunteriktor ti ngaga PBH patut ngemeratka pengelikun
BINTULU: Kaban Parlimen ( MP) Bintulu Dato’ Seri Tiong King Sing enda lantang ati enggau sekeda kunteriktor ti ngaul diri dalam projek ngaga Jalai Besai Pan Borneo ( PBH) baka ti enda ibuhka pekara pengelikun ba jalai alun lebuh pengawa bejalaika kereja ngaga PBH.
Iya madahka diri udah suah mantaika pekara bekaul pengelikun enggau papan tanda ti enda digaga manah sereta enda entu menyana ba sekeda aum sebedau tu, tang piak bekaul baka ti agi enda beratika pekara nya.
Iya mansutka pekara nya kemari penguna nengah jalai nya kenyau ari pun bulan tu tadi rambau atur pejalai iya ngabas rumah panjai sereta kandang genturung pendiau ke bisi di semanjai projek ngaga PBH nya.
“Berebak enggau nya, aku kala bepansa tauka meda empu penusah bebadi ke bisi nyadi ba jalai ti benung digaga ketegal gaya jalai ti belubang sereta balat rusak,” ku iya.
Penusah nya ku iya, tentu bepun ari gaya jalai alun ti lichau kelimpah lampu papan tanda ke enda idup ti ngujungka penguna (jalai alun) tau kena penusah bebadi.
Pia mega ku iya, lebuhka ba rantau jalai ari Sibu ngagai Bintulu, iya enda ngenggaika endang amat bisi papan tanda di semanjai jalai nya, tang lampu pengelikun ke dipasang enda entu manah.
Kebuah pia, iya dipadahka semua ungkus kena nyediaka tanda pengelikun di semanjai ngaga jalai besai nya disengkaum dalam kunterik sempekat entara piak perintah enggau kunteriktor ke dipadu, tang, piak nya (kunteriktor) enda nitihka iya.
Ba lansa ke bekaul, Tiong mega alit ati nama kebuah kunteriktor ti dipadu bejalaika projek ngaga Jalai Besai Pan Borneo enda ngena chara baka nentuka tayar lori tauka injin besai beresi sebedau nengah jalai baka ti digaga di Semenanjung Malaysia ngagai nengeri tu.
Nya alai, iya minta Opis Kereja Raya ( JKR) sekalika perintah nengeri tauka besai matau pekara pengelikun pengguna jalai alun ti bejalaika projek ngaga Jalai Besai Pan Borneo ulih kunteriktor tauka konsultan ti dipadu.