Perintah Sarawak ngaga pemutus ti betul enda nyereta LPM
MIRI: Pemutus perintah nengeri Sarawak ti narit diri dalam Kaunsil Dagang Temuai Malaysia ( LPM) endang betul sereta patut disukung kena mantaika perintah besai sentang hak nengeri tu.
Aktivis rama komuniti, Wan Zain Syed Mohdzar madahka nengeri tu bisi Kaunsil Dagang Temuai Sarawak (STB) kediri empu lalu enda patut dikelaung lebuh ngaga pemutus.
“Kitai nyukung endar pengawa ti digaga tu laban tetiap pengawa tauka pemutus bekaul polisi patut dipejurai dulu enggau perintah nengeri sereta bela dipesetuju,” ku iya madah ngagai Utusan Borneo kemari.
Wan Zain madahka STB ulih merambu enggau ngelangkar pelin dagang temuai ungkup pemaik nengeri Sarawak empu lalu ukai nya ngeruga pemansang industri dagang temuai ti benung ngerembai.
“Enti Chukai Dagang Temuai tu dipejalaika di Sarawak, tu deka ngeruga pemansang industri hotel enggau dagang temuai taja Sarawak nagit penatai lebih 5 juta temuai setaun.
“Pengawa tu betul endar laban kitai enda ulih bepanggai ba perintah be- sai tang kitai deka ngatur kediri empu pemansut belanja nengeri seriris enggau Sempekat Malaysia 1963,” ku iya.
Wan Zain mega mejah jaku dipansutka Menteri Dagang Temuai enggau Main Asal Datuk Seri Nazri Abdul Aziz ti madahka Menteri Dagang Temuai, Seni enggau Main Asal Datuk Abdul Karim Hamzah nya bayat sereta ngeninggi diri.
Jaku ti dipansut iya berupai endar mantupka ati diri empu sereta enda profesional taja Nazri, menteri ti udah lama dalam perintah sereta patut bebasaka ketuai BN ke bukai.
“Seiku menteri ti lawa sereta sumbung baka Nazri tu enda deka tan lama, kitai bela nganti pemutus Pengawa Bepilih Parlimen ( PRU) tu ila sekalika iya terus dipilih rayat tauka pinchin,” ku iya.
Berebak enggau nya, semua Kaban Parlimen ( MP) Sarawak mega patut ningkah sebarang polisi ti bekaul sereta ngeruga pemerat enggau penetap Sarawak.
“Bala sida enda patut nagunka pala aja tanda setuju tang polisi ti dibantaika ba aum parlimen nyangka besibil enggau penetap perintah nengeri,” ku iya.