Operasyen dikemayuhka agi maya pengerami Hari Raya Aidilfitri: JPJ
KUCHING: Opis Perengka Pengangkut Darat (JPJ) deka chakah bejalaika operasyen di serata nengeri tu musim pengerami Hari Raya Aidilfitri ke deka datai tu, dikena ngenukuka pengelikun mensia mayuh.
Direktor JPJ, Mohd Syafiq Anas Abdullah madah, Menteri Perengka Pengangkut Malaysia deka madahka pekara bekaul enggau operasyen Hari Raya sehari tu di Putrajaya, ti dipelabaka berengkah beoprasyen berengkah 18 Jun ngagai 2 Julai tu.
“Bisi 400 iku raban penerit udang-undang JPJ di serata Sarawak ngambi bagi ba operasyen ke diperambu ungkup musim pengerami iya nya dua minggu sebedau enggau dua minggu sepengudah pengerami.
“Kami ke bejalaika operasyen tu ukai ketegal deka ngukum tang laban deka ngurangka kes penusah bebadi ba jalai alun sereta deka ngenukuka pengelikun lalu nyapai juluk pengelantang raban bansa.
“Fokus penerit undang-undang kami, bejalaika operasyen nengah chara besai bekaul enggau mutosikal, pengejang bas ba terminal bas, teksi, kereta suwa enggau perengka pengangkut mensia mayuh ke bukai kelebih agi pengelikun bas ke mai mayuh nyawa orang tambang maya kemisi musim pengerami tu,” ku iya.
Syafiq mansutka pekara nya lebuh dikerandau raban pengarang berita, kemari.
Dulu ari nya iya ngarika JPJ Sarawak nerima 150 bungkus kuih enggau biskut raya ke diberi perintah nengeri nengah Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit ti diatur Opis Orang Indu enggau Ruang Bilik Sarawak (JWKS) ba Auditorium Sri Sarawak, Opis Direktor Jil Nengeri Sarawak di Puncak Borneo ditu, kemari.
“Nambahka nya kami deka matau sereta deka ngaga empang ba sekeda jalai alun ba kandang endur ke patut alai meresa, kelimpah ari nyaru diri nyadi orang tambang ari Kuching ke Sibu, Miri, Bintulu enggau kandang endur bukai.
“Nya alai enti kami tetemuka deriba bas ngambi tauka nurunka orang tambang ba tengah jalai ke patut ari terminal ngagai terminal, kami deka bejalaika atur tekala nya tauka penyalah bukai ke ditemu maya nya.
Nitih ku Syafiq, JPJ mega bisi bejalaika kerejasama enggau ejensi bukai baka Agensi Anti Dadah Kebangsaan (AADK) enggau polis.
“Di mengeri besai, JPJ deka berati penyalah ngelanggar lampu trafik laban tebal agi penusah kerita belantak nambah di Sarawak ketegal pengelaju enggau penyalah ngelanggar lampu trafik.
“Baka enti lampu trafik nya betukar ngagai chura kuning, deriba enda ulih ngetuka kereta tauka nekanka minyak ngambi laju agi,” ku iya seraya madahka nya ti ngujungka penusah bebadi ba jalai alun ke udah ulih disadang.
Kelimpah ari nya, lebuh ditanya bekaul enggau kandang endur ke nyadi ‘hotspot’ JPJ, Syafiq madahka jalai ti balat betiku enggau jalai ti sebedau tu jalai ke dikelala polis suah endur penusah penusah bebadi.