JWKS ransing deka neruska program ‘Majlis Sumbangsih Kuih Raya’
KUCHING: Opis Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit dipelabaka deka minta tambah ungkup belanja dikena ngatur program tiap taun iya nya ‘Majlis Sumbangsih Kuih Raya 2018’.
Menteri iya, Datuk Fatimah Abdullah madahka, opis menteri iya ti bejalaika tanggungpengawa nya ngarika perintah nengeri kenyau ari taun 1990 nengah Biro Wanita ke diatu dikelala enggau nama Opis Orang Indu enggau Ruang Bilik Nengeri Sarawak (JWKS).
‘Majlis Sumbangsih Kuih Raya’ sebengkah program meri kuih raya ngagai raban penyaga pengelikun enggau penerita adat di nengeri tu dikena ngingat sereta meri terima kasih ngagai pengawa sida ke nyaha pengelantang nengeri maya pengerami Hari Raya Aidilfitri.
“Ba ataun 2018 ungkup program tu kitai deka minta ngagai perintah nengeri ungkup belanja tambah dikena nyendiaka kuih enggau kek raya, laban bisi sebuah agi ejensi ke deka ditambah nyadi penerima taun baru, berindik ari bisi peminta.
“Taun tu bisi 7,400 bungkus kuih raya ti diagihka ngagai lapan ejensi penerima baka Angkatan Tentera Malaysia (2,800), Polis DiRaja Malaysia (1,800), Opis Pengangkut Darat (150), Opis Jil Sarawak (300), Agensi Penguatkuasaan Maritim (950), Jabatan Kastam DiRaja Malaysia (300), Opis Bomba enggau Penyelamat Malaysia (800) enggau Jabatan Imigresen Malysia bisi nerima 300 bungkus.
“Majlis Sumbangsih Kuih Raya tu diatur kelai terima kasih ari Perintah Nengeri enggau rayat Sarawak ngagai tanggungpengawa sereta pengawa berambun nyawa raban pengelikun enggau penerit adat ti bepenegap tinggi bejalaika tangungpengawa ke udah tetapka enda ngira maya gawa,” ku iya ti enda madahka bagi ejensi ke dipasuk nyadi penerima nya taun baru.
Fatimah mansutka pekara nya lebuh ke bejaku ba Majlis Penyerahan sumbangsih Kuih Raya ngagai Opis Jil Sarawak enggau Opis Pengangkut Darat (JPJ) ke diatur JWKS ba Auditorium Sri Sarawak, Pejabat Pengarah Penjara Negeri Sarawak, kemari.
Berebak enggau tu Deritor Opis Jil TKP Ajidin Salleh enggau Direktor JPJ Sarawak Mohd Syafiq Anas Abdullah lebuh ke bejaku ba pengerami nya, beterima kasih ngagai Perintah Nengeri ti meri kuih enggau biskut raya nya ungkup anggota enggau penerit adat opis nya ke enda ulih kemisi Hari Raya taun tu.
Nitihku iya, bisi 90 iku ari 14 Gerempung Ukai Dikuasa Perintah (NGO) ke ngambi bagi ba pengawa mungkus kuih enggau biskut raya 2017 ke diatur ba Wisma Wanita, JWKS kena 10 Jun tu tadi, kelimpah ari 130 anggota lain-lain pangkat ari lapan ejensi penerima nya.
Pengawa nyendiaka kuih enggau biskut raya nya mungkur tujuh buah NGO indu baka Pergerakan Wanita PBB N.7 Samariang, Dewanita DUBS, Persatuan Ibu Tunggal Sarawak, Helwa HIKMAH, Sarawak Indian Women Association, Persekutuan Perkumpulan Wanita Sarawak enggau Pengusaha Kek Lapis Sarawak.
Taun 2016, bisi 6,500 bung- kus kuih raya udah diagihka ngagai tujuh ejensi penerima ke nyaga pengelikun enggau neritka adat tauka undang- undang.
Sama bisi datai ngagagi pengerami nya kemari, Menteri Muda Pengelantang Raban Bansa Datuk Francis Harden enggau Direktor JWKS Noriah Ahmad enggau kebukai.