Kelvin, Joseph nentuka penanggul karan ba Dudong diputar lengkas

SIBU: Enggai meda rayat merinsa, ngining pemansang orang bukai, dia dua iku chalun ti diasika Parti Sa’ati Rayat Sarawak ( SUPP) bagi Parlimen Lanang udah niki Opis Karan Sarawak ( SEB) betanyaka kebuah enam buah rumah panjai ba Kunsil Nengeri ( DUN) Dudong mengkang napi penanggul karan nyentuk ke diatu.

Seduai tu iya nya Kelvin Kong enggau Joseph Chieng.

Penyuntuk ti diasaika rayat rumah panjai nya ditemu maya ke ngabang Gawai Dayak empai lama tu tadi.

“Maya ke ngabang aku bisi niki ngagai rumah panjai tu lalu nemu sida mengkang napi penanggul ba pemansang bekal karan enti dibida enggau rumah panjai ke bukai ba ditu.

“Rumah panjai tu iya nya Rumah Jackson Sibat, Rh Anthony Janggu, Rh Mai Sigai, Rh Dumin Bakak, Rh Sain Mani enggau Rh Kompani,” pia ku Kelvin.

Maya ke ngelawa opis SEB nya, iya enggau Joseph Chieng bisi berandau enggau Menijer Besai (Projek enggau Pelin) Law Hui Lee enggau Pelin Injinir Mohamad Idhwan Apendi.

Ba pengawa tu, Law madah, mensia mayuh ti bisi penanggul ba belanja nampung karan tau nulis peminta sida ngagai Skim Bekal Karan Menua Pesisir (RES) ari baruh Opis Menteri Pemansang Menua Pesisir.

“Kita tau minta saup ari RES nampung karan ngagai rumah.

“Kelimpah ari nya, piak kami mega ulih nyaup nampung karan nengah Assisted Wiring Scheme (AWS) alai mensia mayuh tau ngelun tauka mayar ungkus dikena nampung karan enggau chara berenggat nyentuk ngagai 36 bulan,” ku Law nerang maya berandau enggau Kelvin enggau Joseph Chieng.

Ba pekara ti bekaul mega, Chairman SUPP Dudong Datuk Dr Soon Choon Teck empu udah mantaika pekara nya ngagai Menteri Muda Perengka Mensia Mayuh Datuk Dr Stephen Rundi, empai lama tu tadi.

“Kami deka semampai beratika penusah ti bisi nuntung rayat lalu bebendar deka nyaup sida mutar ngambika sida baka rayat bukai ngasaika pemansang baikka baka jalai alun, kuasa karan tauka bekal ai paip ba Parlimen Lanang ditu,” pia ku Kelvin enggau Joseph.