Bup Latih Sistem Jaku Iban Pom 1-3 udah berengkah dijual
SIBU: Bup Latih Sistem Jaku Iban Pom 1-3 ti bepelasarka bup Tatabahasa Iban enggau Sistem Jaku Iban di Sekula 2007 ti dichelak Opis Pemansang Kurikulum, Opis Menteri Pelajar Malaysia enggau Sempama Iban udah berengkah dijual.
Harry Usup Umbar ti nengkebang bup tu madah, latih ba bup nya bepelasarka format tanya dalam peresa ‘Pentaksiran Tingkatan’ 3 (PT3). gau struktur genteran jaku.
“Kelimpah ari nya, nembiak mega tau bendar ngaga latih ngaga baru semua bansa genteran jaku enggau ngiga penyalah jalai ngena jaku ba genteran jaku.
“Bup aktiviti tu mega bisi disempulang siti unit Model Peresa PT3,” ku iya ti mega ex-pengajar.
Harry mega madah, bup tu engkeman bendar nyadika malin bala pengajar Jaku Iban.
“Pia mega bup engkeman dikena bala pengarang bup, artikel, esei, cerpan, novel tauka asil tulis ke bukai dikena nyungkakka agi tikas pemanah karang kita,” pia ku iya nerang.
Harry kala ngajar Jaku Iban ba sekula sekondri ari taun 1988 nyentuk ke iya pinchin kena 3 Jun 2015.
Kenyau ari 1988 iya nyadi Ketuai Panitia Jaku Iban ba SMK Luar Bandar Sibu, SMK Sungai Merah enggau SMK Sibu Jaya lalu mengkah chakah ba semua aktiviti ngajar Jaku Iban ba sekula nyengkaum nyadi fasilitator ba kus, woksop enggau licha bekaul enggau Jaku Iban.
Harry mega nyadi seiku pengarang ti tebilang sepengudah iya mujur ngempu penuduk lumur tiga ba pekit ngarang novel ke diatur Dewan Bahasa dan Pustaka (DBP) nengah novel iya Gerila Rimba.
Kenyau ari nya iya suah dikangau ngulu kus, miting, woksop, kolokium, Perkampungan Penulis Sarawak 2002 enggau 2010 ti bekaul enggau sastera.
Iya mega kala tiga kali menang ba pekit ngarang novel iya nya ba taun 1998, 2000, 2004 enggau ‘drama pentas’ 2008 ba Jaku Melayu ke diatur DBP, Sarawak enggau empat kali menang ba pekit ngarang Esei Kenegaraan ( Bahasa Iban) ke diatur Opis Pemadah Malaysia Sarawak.
Nambahka nya, iya suah ngeluarka macham bengkah genre sastera baka novel, drama enggau cerpan.
Kelimpah ari nya, iya mega kala ngeluarka bup Tatabahasa Iban, Kamus Dwibahasa, Kamus Tribahasa, Latih Intensif Jaku Iban PMR, SPM, Bup Teks Jaku Iban Pom 2, 3, 4 enggau 5 enggau Jaku Iban Taun 3 2016.