Program ngiling tikai di Rh Thomas Ramba richah

SRI AMAN: Program ngiling tikai Rh Thomas Ramba, Brangan Ulu udah diatur enggau penuh pengerami, kelai nutup Gawai Dayak 2017.

Pengerami nya digulu temuai ti pemadu dipebasaka iya nya Menteri Muda Pengelantang Raban Bansa, Datuk Francis Harden Hollis, ke mega Kaban Kunsil Nengeri (ADUN) Simanggang.

“Pengerami gawai ngiling tikai tu kelai pengerami Hari Gawai udah tembu, lalu raban bansa Dayak berengkah baru ngereja pengawa baka selama, ke ulih nyungkak tikas ekonomi ruang bilik.

“Lalu tetiap iku tuai rumah ( TR) patut bisi perambu dikena ngenyakahka agi pemansang ekonomi ngambi semua peranak ke dipegai ulih pansut penyeranta,” ku Harden.

Iya mansutka penemu nya lebuh bejaku ba pengerami Gawai Ngiling Tikai ke diatur SUPP Pampang Simanggang begulai enggau JKKK Rh Thomas Ramba, Brangan Ulu, ditu apin lama.

Berebak enggau tu Harden ngelalau apai indai tauka ruang bilik ngambika ngemeratka pasal pelajar anak.

Iya bepenemu pelajar ulih ngubah tikas pengidup ruang bilik dudi hari.

“Pelajar anak mega anang enda dikemeratka, laban nengah pelajar aja pemansang rebak baru ulih ngubah ngagai pengidup ke menyana agi,” ku Harden.

Berebak enggau tu iya udah ngemendarka ungkup be- lanja geran projek mit menua pesisir (MRP) 2018 ngagai Komiti Pengelikun enggau Pengelantang Genturung Pendiau (JKKK) sepenyampau RM5,000 enggau Biro Orang Indu RM3,000.

Sama bisi datai ngagai pengerami ngiling tikai nya, Pemancha Lee Siang Hua, Cr. Andar Suntai, Sapit Chairman Majlis Daerah Sri Aman Jilin Atar sereta ketuai Pampang Indu SUPP Simanggang, Ling Siew Hung.