Menua pesisir tetap deka disambung jalai: Masing
Jampat tauka lubah bepanggai ba belanja kandang menua ke bisi meri penatai pemisi deka dikemeratka dulu
KUCHING: Kandang menua pesisir di nengeri tu tetap deka disambung ngena jalai alun tang semina jampat tauka lubah mimit.
Sapit Kepala Menteri, Tan Sri Datuk Amar James Masing madahka, kebuah laun laban bisi pengurang ba belanja, tang baka di menua Baram enggau Baleh enti tekad hidroelektrik (HEP) dia kandang menua nya deka jampat agi datai jalai.
“Lubah tauka jampat semua kandang menua pesisir di Sarawak tetap deka disambung jalai alun tang laban bisi pengurang ba belanja, Perintah Sarawak ngemeratka dulu kandang menua ke bisi meri penatai pemisi dulu.
“Kitai deka nyambung kandang menua ti ulih ngasilka penatai pemisi, ambika chunto HEP iya nya seiti ari ke ulih ngasilka penatai pemisi.
“Tambah mega enti bejalaika HEP ba kandang menua nya, tentu nya deka ngenyampatka agi pengawa ngaga jalai,” ku iya.
Lubah tauka jampat semua kandang menua pesisir di Sarawak tetap deka disambung jalai alun tang laban bisi pengurang ba belanja, Perintah Sarawak ngemeratka dulu kandang menua ke bisi meri penatai pemisi dulu. Tan Sri Datuk Amar James Masing Sapit Kepala Menteri Sarawak
Masing mansutka pekara nya lebuh dikerandau raban pengarang berita pengudah tembu pengerami Gawai Ngiling Tikai ke diatur ba rumah iya ditu, lemai kemari.
Pengerami nya kemari bisi digulu Tuai Megai Menua Tun Pehin Sri Abdul Taib Mahmud enggau bini iya Toh Puan Datuk Patinggi Ragad Kurdi Taib sereta Kepala Menteri Datuk Amar Abang Johari Tun Openg enggau bini iya Datin Amar Datuk Juma’ani Tun Tuanku Bujang.
Ngenang pekara nya baru, perintah deka terus minta dipesetuju ari sida ke diau ba kandang menua ke ulih digaga HEP ngambika sama ngambi bagi, laban deka bejalaika HEP kitai enda tau enda bisi perengka guna mensia mayuh, ku iya.
“Di Baleh ambika chunto, enti HEP enda digaga, jalai alun besai nya enda ulih digaga dalam timpuh 30 ngagai 40 taun ke deka datai.
“Bisi urung 40 buah rumah panjai di semanjai Sungai Baleh deka dipansa jalai, tang enggau ungkus belanja RM2 bilion, aku ngasaika perintah nadai belanja dikena semina nyambung jalai ngagai rumah panjai nya.
“Nya alai aku madah ke sida, tekad hidro ulih digaga, nya deka nyungkak penatai ungkup nengeri tu. Nya mega ulih nyendiaka kuasa murah ke meri penguntung ngagai nengeri tu,” ku iya seraya madahka enti HEP dia jalai alun mega deka digaga tu ‘ win- win situation’.
lebuh ke ngenang pasal di Baram, iya ngarapka peranak di menua nya ulih berunding sereta meretika ari baruh HEP Baram ke diperambu, bisi orang diau ba endur nya.
“Enti jalai digaga diatas din, mayuh orang ke bulih penguntung. Enti peranak di Baram enggaika tekad ai nya, anang nyalahka aku enti kandang menua nya nadai datai jalai,” ku iya ti mega Menteri Pemansang Infrastruktur enggau Perengka Pengangkut.