Anang sengapa ngayahka duit JKKK, ku Masir
Kaban JKKK dilalau ngambika nguna geran nya ke tuju pemansang pemansang rumah panjai diri
SRI AMAN: Sapit Menteri Dalam Menua Datuk Masir Kujat ngelalau kaban komiti Pemansang enggau Pengelikun Genturung Pendiau (JKKK) di nengeri tu nguna genap agih belanja ke diberi pengari rayat ke tuju pemansang genturung pendiau tauka rumah panjai diri.
Kitai enggai meda geran ke diberi nya diayah sengapa sereta enda dikena enggau betul. Pengujung iya genap nembiak redak ba rumah panjai tauka genturung pendiau nya rugi ketegal belanja ke udah diayah sengapa. Datuk Masir Kujat Sapit Menteri Dalam Menua
Iya madah, nyema agih belanja ke diberi nya dikena enggau betul tentu genturung pendiau tauka rumah panjai ke nerima agih belanja nya ulih mansang seriris enggau pemansang kemaya hari.
“Aku ngarapka genap JKKK di nengeri tu nguna genap agih belanja nya enggau manah ke tuju pemansang genturung pendiau enggau rumah panjai diri.
“Kitai enggai meda geran ke diberi nya diayah sengapa sereta enda dikena enggau betul. Pengujung iya genap nembiak redak ba rumah panjai tauka genturung pendiau nya rugi ketegal belanja ke udah diayah sengapa,” ku iya.
Iya ke mega Kaban Parlimen Sri Aman madah munyi nya rambau bejadika Pengerami Ketuai Begulai Enggau Rayat sereta Pengerami Ngiling Tikai 2017 diatur Opis Pekara Khas ( JASA) Sri Aman, Komiti Pemansang enggau Pengelikun Genturung Pendiau (JKKK) Rumah Beredai, Spatak Empanggu, Jalai Paip, Sri Aman enggau OPis Servis Pengari Rayat Parlimen Sri Aman ditu pagi ensanus.
Masir mega madah, enti nitih genap geran ke diberi nya patut dikena meli perengka rumah lalu ukai ke tuju bukai.
“Enti pengari rayat kita meri geran dikena meli perengka rumah, nyadi duit nya patut dikena meli perengka rumah ukai dikena meli utai bukai.
“Nya alai, genap JKKK patut nemu baka ni deka nguna duit JKKK kita ngambika duit JKKK nya enda diayah sereta dikena manah,” ku iya.
Iya mega nangkan JKKK patut nyediaka seiti bup rikod endur nulis genap pekara ke dibeli.
“Rikod nya beguna amat laban genap utai ke dibeli kita patut bisi dalam rikod lalu semua kaban JKKK nemu kini tuju duit JKKK nya.
“Tu mih tanggungpengawa sida ke udah dipadu nyadi tukang wang JKKK, tukang wang patut bejalaika tanggungpengawa enggau manah lalu nentuka semua pekara dibeli bisi dirikod. Kebuah pia, laban ari rikod nya kitai nemu kini duit nya dibelanja,” ku iya.
Sama bisi datai Injinir Bagi Menua, Opis Kereja Raya (JKR) Sri Aman, Bujang Kanang, Pemesai Opis Pemansang Raban Bansa (KEMAS) Sri Aman, Josi- pah Sabas, Penghulu Bailey Gamang, ketuai raban bansa ke besemak.
Masir mega bisi ngungkupka agih belanja RM30,000 ngagai JKKK Rumah Beredai, Spatak Empanggu, Jalai Paip, Sri Aman dikena ngemanah rumah panjai nya ba taun 2018 ila lalu RM5,000 diberi ngagai JKKK enggau Biro indu rumah panjai nya ungkup taun tu.