Tiong enggau kaban PDP ngabang Raya ngagai Kpg Sebuan
BINTULU: Kaban Parlimen Bintulu, Dato’ Seri Tiong King Sing enggau bala kaban Parti Demokratik Progresif (PDP) Bintulu bisi bejalai ngabang Raya ke rumahrumah ketuai raban bansa sereta kaling ke dikelala iya ba Kampung Sebuan Besar enggau Kampung Sebuan Kecil, ensanus.
Entara rumah ke bisi dilawa sida iya nya rumah Ketuai Kampung Sebuan Besar, Sauni Saibi, Ketuai Kampung Sebuan Kecil, Bolhassan Semut sereta rumah-rumah kaling ke dikelala ba dua bengkah genturung pendiau ke berimbai nya.
Iya madah pengawa ngabang lebih agi maya musim pengerami endang patut terus dikemeranka semua bansa ba bagi menua tu.
“Adat baka tu endang udah lama dikemeran kitai kenyau ari kelia, nya alai iya patut terus dikemeran dikena ngerapit agi kaul entara pupu bansa ditu,” ku iya.
Nya alai, ku iya adat baka tu patut nyadi pelasar ngagai semua piak ngerapitka kaul enggau pangan diri dikena mandangka pengelikun enggau pengelantang rayat di Bintulu.
“Utai ke pemadu beguna iya nya adat ngabang ngagai rumah bala bakin nyerumba Hari Raya deka mantu kitai mereti agi pasal pengerami menyadi kitai ke bepengarap Islam kelimpah dikena mereti agi pemaik ba bulan Syawal,” ku iya. SIBU: Urung 2,484 premis dagang udah diperesa Opis Menteri Dagang Dalam Menua, Gerempung Kerejasama enggau Pekara Bebeli Barang ( KPDNKK) nyerumba Skim Nagang Rega Musim Pengerami Hari Raya 2017.
Kepala Pemesai Penerit Adat KPDNKK Sarawak, Abdul Hafiz Abdul Rahim madah, asil pengawa meresa nya dia sida bisi bejalaika atur ba dua kes ke ditemu di Kuching.
“Kededua kes tu ditemu ngelanggar ‘Akta Kawalan Harga dan Anti Pencatutan’. Kami mega bisi ngerampas barang berega RM66 sereta minta bayar kompaun penyampau RM200,”ku iya.
Iya madah munyi nya rambau ditanya pasal kes sepanjai timpuh Skim Nagang Rega pengelama 14 hari ke udah.
Ari 2,484 premis ke diperesa, 508 premis di Kuching, Miri (423), Mukah (243), Bintulu (232), Sibu (230), Limbang (220), Sri Aman ( 217), Kapit ( 215) enggau Sarikei (196).
Ulah nikika rega barang endang seiti penyalah dibaruh ‘Akta Kawalan Harga dan Anti Pencatutan 2011’.
Bekau ari penyalah nya, orang nya ulih diukum manggai RM100,000 tauka jil tiga taun tauka kededua ukum, lalu mayar kompaun manggai RM50,000.
Ungkup kompeni, sida ulih ditunggu manggai RM500,000 tauka mayar kompaun manggai RM250,000.