ICILE bejuraika pemansang jaku Iban kena 7-8 Julai tu
MIRI: Keterubah iya, ketuai raban bansa Iban pelilih Miri ngatur Konferen Entarabansa Jaku Iban & Etnografi (ICILE) 2017 kena 7 nyentuk 8 Julai ditu.
Pengawa ngatur randau jaku Iban tu dibantu Unit Jaku Iban Palan Pematih Pengajar (IPG) Kampus Sarawak, Miri lalu diatur ba Dewan Muhibbah IPG Kampus Sarawak ditu.
Chairman pengatur, Pemancha Wilson Siang madah randau tu ila deka dipenyadika Sapit Kepala Menteri Sarawak, Datuk Amar Douglas Uggah Embas, ke deka mantaika dua kereta jurai ba hari keterubah iya nya ‘Jaku Basa Iban’ dibantaika Padang Luna enggau ‘Penempa Jaku Iban’ dibantai Dr Nelson Tandang.
“Udah nya ba hari kedua, 8 Julai, lima keretas jurai enggau etnografi deka dibantai iya nya ‘Pemansang Jaku Iban’ ari Prof. Madya Dr Chemaline Usup; ‘Nanka Adat Asal’ ari Prof. Madya Dr Neilson Ilan Mersat sereta topik ‘Pemantapan Terminologi Akademik Bahasa Iban’ ari Profesor Madya Dr Bromeley Philip,” ku Wilson.
Ku iya, dua agi topik ke deka dibantai iya nya ‘Adat Ngulit & Tebalu Iban’ dibantai Dr Robert Menua Saleh ke mega Direktor Pansik Yayasan Tun Jugah sereta ‘Bahasa Etnik di Borneo’ ti deka dibantaika pengelicha entarabansa, Dr Yabit Alas, ke mega pengelicha ari Universiti Brunei Darussalam.
Ku Wilson, taja mayuh orang bisi ati nyereta konferen tu tang semina 400 pesereta dipelaba ulih ngambi bagi, laban palan endur duduk enda mayuh, kelimpah nadai mayuh belanja dikena ngatur ba palan ke besai agi.
“Nya alai, aku ngarapka dudi hari ila, sekeda Gerempung Ukai Dikuasa Perintah ( NGO) bepelasarka bansa Dayak Iban, ulih nyaup kami ngatur program tu besai agi,” tandu iya.
Wilson madah pengerami nutup program nya ila dipelaba deka dipenyadika Kaban Kunsil Nengeri ( ADUN) Samalaju, Majang Renggi.