MAH nyemetak mantah Chukai Dagang Temuai
KUCHING: Gerempung Hotel Malaysia (MAH) Sarawak tetap enda begilik penemu nyemetak mantah atur Chukai Dagang Temuai (TTx) lalu enggai hotel sida nyadi palan mupu chukai.
TTx ke deka belabuh diterit 1 Julai 2017 tang dipadah baru dilanjar nyentuk 1 Ogos ila.
Presiden MAH Sarawak Ibrahim Nordin madah, ngelanjar ukai nyadika kedalih tang gerempung sida sigi enda setuju enggau atur nya lalu mantah laban nya deka meri pangka enda manah ngagai dagang sida.
“Ba MAH Sarawak kami enggau bekelikuhka (TTx) dilanjar tang sekali agi kami nyemetak madah kami sigi mantah pejalai atur chukai nya laban kami enggai nyadi hotel pemupu chukai.
“Kami minta betemu enggau opis menteri bekaul berundingka pemar enggau pekara ti nekul pengawa mupu chukai nengah hotel.
“Diatu kami merambu ngambika patut bisi pelin chara mupu ke betul sereta dipeda lurus,” ku iya madah ngagai Utusan Borneo ditu, kemari.
Kenyau beberapa minggu ke udah, dia pekara tu nyau meri pangka ngagai industri sereta tauke hotel pengudah atur TTx diterang, ku iya.
Ku iya, pekara nya mega ulih ngujungka dagang sida kusut berindik ari atur chukai nya.
Ibrahim madah, taja ger- empung udah bebendar nganjung mesej ngagai opis menteri bekaul nengah bemacham chara tang pengawa nya enda ngasi laban perintah majak keran bejalaika atur chukai.
Ku iya, taja mayuh bengkah penerang ari menteri-menteri sereta ejensi bekaul pasal TTx kenyau beberapa hari ke udah tang nyentuk diatu nadai penerang rasmi pasal pejalai atur Chukai Dagang Temuai.
“Engka engkeman agi disebit penerang pasal atur Chukai Dagang Temuai agi bedau ditemu silik.
“Taja pia dalam napi penanggul tu, kami ba industri tu deka begempung enggau pangan diri lalu kami andal tu deka meri pangka ngagai polisi ke tau dikumbai ‘mejal’ kami,” ku Ibramin.
Iya madah gerempung mega deka bebendar ngiga chara pemadu manah laban nyadi sebengkah entiti ke mega industri hotel Malaysia.
Apin lama ke udah nitih penerang sebengkah surat kabar, Menteri Dagang Temuai enggau Main Asal Datuk Seri Nazri Aziz madah atur chukai dagang temuai deka dilanjar nyentuk 1 Ogos laban sistem nya bedau tembu meruan.
Nazri mega madah peranak menua luar deka dipinta mayar chukai dagang temuai, tang peranak menua tu ke bemalam ba hotel tiga bintang enggau baruh ari nya enda ibuh mayar chukai.