Kort Nembiak Mit: Kes keterubah dipendingka 4 Julai
Kort ukai semina nentuka pengelantang, hak nembiak mit tang pesalah mega ulih jampat ditinggang ukum
KUCHING: Kort Khas Pengawa Salah Seksual Nembiak Mit deka mendingka kes keterubah kena 4 Julai tu di Putrajaya.
Pekara nya dipadahka Menteri Pemansang Orang Indu, Ruang Bilik enggau Raban Bansa, Dato Sri Rohani Abdul Karim dalam aum pengarang berita ensanus.
Kort khas nya ukai semina nentuka pengelantang enggau hak nembiak mit nya dijaga manah tang pesalah ke ngereja penyalah nya mega ulih jampat ditinggang ukum ke patut.
“Kes keterubah ti deka diatur ba Kort Nembiak Mit ti bekaul enggau penyalah seksual ngagai nembiak mit deka diatur kena 4 Julai tu, di Putrajaya.
“Enti pesalah nya didawa ari baruh Akta Nembiak Mit, berindik ari ukum ti udah ditikika, dia pengereja pen- yalah nay deka nerima ukum jil 20 taun tauka maksimum RM50,000 tauka kededua ukum nya, kelimpah ari bisi ngaga pengawa ke raban bansa enggau ke bukai.
“Lebuh kami ngubah (akta), kami endang ngasaika tu berat laban kitai berasai takut eng- gau ke bukai, enti udang-undang enda tentu dikemeratka tu deka meri empas ke enda manah,” ku iya.
Dulu ari nya Rohani ngelalu sereta nyambut penatai mensia mayuh ke datai ngabang nga- gai ‘Majlis Bersama Raikan Aidilfitri’ Opis Menteri Pemansang Orang Indu, Ruang Bilik enggau Raban Bansa ke diatur ba Begunan DUN lama ditu, kemari.
Pengabang ke dipebasa bisi datai iya nya Kepala Menteri Datuk Amar Abang Johari enggau bini iya Datin Amar Datuk Juma’ani Tun Tuanku Bujang.
“Ukai semina orang ke ngeraja penyalah tang orang ke bisi kaul ngereja penyalah mega deka sama didawa,” ku iya seraya madahka kort khas nya ditumbuhka di Putrajaya sebedau dikerembaika ngagai nengeri bukai.
Lebuh ditanya bekaul enggau kes pasung ke nyadi di Kampung Buntal ditu beberapa hari sebedau nyambut Hari Raya, iya nya nembiak ke ngereja penyalah nya beumur 14 taun lalu ke dipasung nya nembiak mit beumur 6 taun, diri petunggal, Rohani madahka mekanisma sama deka dipejalaika.
“Tu kes dibaruh kort seksual, pasung. Kort Khas tu ungkup pesalah nembiak mit lalu ke kena pasung nya mega nembiak mit.
“Sarawak, deka ngena mekanisma ke sama,” ku iya.
Kelimpah ari nya lebuh ditanya bekaul nasit seiku nembiak mit lelaki beumur lima taun ti mati dipelabaka ayahka apai tiri, ke nyadi di Jertih, Terengganu, Rohani madahka kes nya agi dalam pansik polis.
Iya madahka opis menteri iya deka meri kerejasama sereta deka bejalaika ukum tauka atur ke patut enti apai indai nya ditemu salah.
“Baka ke dipadahka pegawai aku, kes tu agi dalam pansik polis laban mayuh tegal diberi, lalu kitai bepanggai ba polis lalu baka ke ngelama tu polis enti bekaul enggau nembiak mit sida deka ngena Akta Nembiak.
“Enti kitai nemu nembiak mit nya enda dikeibuh, diayah laban kitai ke bejalai atur kami deka meri kerejasama ngagai polis mansik kes tu kelimpah ari ti meri kaunseling enggau ke bukai nyema bisi peminta.
“Kitai meri peluang ngagai polis bejalaika pengawa lalu kami opis menteri deka nitihka kes nya,” ku iya lebuh ke meri penerang bekaul enggau kes ke nyadi di Terengganu.
Kes keterubah ti deka diatur ba Kort Nembiak Mit ti bekaul enggau penyalah seksual ngagai nembiak mit deka diatur kena 4 Julai tu, di Putrajaya. Dato Sri Rohani Abdul Karim Menteri Pemansang Orang Indu, Ruang Bilik enggau Raban Bansa