Anang enda ransing ngereja pengawa betanam betupi
Agi tubah tanah puang ke ulih dikemansang nengah betanam betupi dikena nyungkak penatai pemisi
SRI AMAN: Kaban Kunsil Nengeri (ADUN) Bukit Begunan, Datuk Mong Dagang meransang peranak rumah panjai di nengeri tu meseti ransing ngereja pengawa betanam betupi dikena nambahka penatai pemisi ba rumah panjai.
Iya madah, agi tubah tanah puang ba rumah panjai ke ulih dikemansang enggau pengawa betanam betupi dikena nyungkak ekonomi ba rumah panjai.
“Perintah semampai nyukung pengawa peranak rumah panjai ngemansangka tanah puang enggau pengawa betanam buah, sayur sereta pengawa besai baka numbuh sawit, getah, lada enggau ke bukai.
“Kebuah pia, utai tanam baka tu ulih nambahka penatai pemisi diri sebilik sereta kita serumah empu,” ku iya.
Ku iya, tu mega mayuh meri pemaik ngagai semua kitai enti tanah nya dikemansangka beamat-amat.
Mong madah munyi nya rambau bejadika Dewan Datuk Mong enggau Program Nutup Gawai 2017 diatur Komiti Pemansang enggau Pengelikun Genturung Pendiau ( JKKK) Rumah Lanchum Dagang, Kam- pung Sungai Tengang, ditu kemari.
Iya mega nangkan rayat di nengeri tu ngambika nguna sereta ngerebit peluang ke bisi disedia perintah nengah chara minta bantu lebih agi bekaul enggau pengawa betanam betupi.
“Perintah seruran sedia mantu rayat ke bisi minta bantu, udah nya rayat pa- tut ransing ngereja pengawa ngambika bantu ke diberi perintah nya bisi dipeda asil.
“Anang sesekali, pengudah perintah meri bantu, kita nyau enda bebendar gawa,” ku ngelalau mensia mayuh ke bisi ngulu pengerami nya.
Dulu ari nya, pengerami nya dipenyadika Sapit Menteri Dalam Menua ke mega Kaban Parlimen Sri Aman, Datuk Masir Kujat.
Ba pengerami nya mega, Mong bisi ngungkupka belanja manggai RM30,000 ngagai JKKK Rumah Lanchum, Kampung Sungai Tengang lalu RM 20,000 diberi ngagai JKKK sereta RM 10,000 ungkup Biro Indu sida.
Kelimpah nya, Mong mega bisi ngungkupka geran penyampau RM 5,000 ngagai Komiti Dewan Datuk Mong Dagang ungkup taun 2017.
Perintah semampai nyukung pengawa peranak rumah panjai ngemansangka tanah puang enggau pengawa betanam buah, sayur sereta pengawa besai baka numbuh sawit, getah, lada enggau ke bukai. Datuk Mong Dagang Kaban Kunsil Nengeri (ADUN) Bukit Begunan