Pengawa ngaga pasport baru di Sri Aman diatu lebih muntang
SRI AMAN: Opis Imigresen Sri Aman deka nguna Sistem Ngemaru sereta Ngaga Pasport Baru ke ulih tembu dalam timpuh sehari berengkah bulan Julai tu.
Sapit Menteri Dalam Menua, Datuk Masir Kujat madah, tuju ngena sistem baru tu ba opis di Sri Aman ngambika enda masau jam raban ke deka ngaga pasport baru tauka ngemaruka pasport lama nurun ngagai Indu Opis Imigresen di Kuching ungkup tuju ke sebaka.
“Sebedau tu, timpuh ngemaru sereta deka ngaga pasport ngambi timpun 14 hari baru ulih tembu laban peminta nya dulu dianjung ngagai Indu Opis ba Kuching sebedau ditikal ke baru ngagai Opis Sri Aman,” ku iya.
“Enti sistem baru nya udah dikena belabuh Julai tu, iya deka ngelimat belanja sida ke ngaga pasport baru laban enda ibuh agi nurun ke Kuching,” ku iya.
Masir madah munyi nya rambau bejadika Dewan Datuk Mong Dagang enggau Nutup Gawai Dayak 2017 diatur Komiti Pemansang enggau Pengelikun Genturung Pendiau ( JKKK) Rumah Lanchum Dagang, Kampung Sungai Tengang ditu, kemari.
Iya mega madah, nge- lama tu tebal agi sida ke deka ngaga pasport nurun ke Kuching tauka ngelawa UTC ke semak laban dia ulih tembu dalam timpuh sejam dua aja.
“Nya alai, nengah sistem tu iya deka lebih ngemuntangka rayat kitai Sri Aman, Lubok Antu, Betong, Sarikei sereta menua ke besemak ngaga pasport sebarang maya laban nya ulih tembu dalam beberapa jam aja.
“Tu mega sebengkah ari pengawa baru dipejalaika Opis Menteri Dalam Menua ( KDN) ungkup opis ke dikuasa baka imigresen,” ku iya.
Sama bisi datai ba pengera- mi nya, Kaban Kunsil Nengeri ( ADUN) Bukit Begunan, Datuk Mong Dagang, Injinir Opis Kereja Raya (JKR) Sri Aman, Bujang Kanang, Pemesai Opis Pemansang Raban Bansa (KEMAS) Sri Aman, Josipah Sabas, Ketuai Kaunsil Pelilih Sri Aman, Richard Tawan Sedu, Penghulu Johnny Lumi sereta ketuai raban bansa ke bukai.
Ba pengerami nya mega, Masir bisi madah deka ngungkupka agih belanja RM 10,000 ngagai JKKK Rumah Lanchum Dagang, Kampung Sungai Tengang dikena sida ngatur program ke pemaik rumah panjai.