Lapan gambar bujang berani ba Tiang Pengingat deka diadu baru

KUCHING: Pengelelang lapan ari semilan limpir gambar bujang berani ke dilekat ba Tiang Pengingat ba Taman Budaya ditu ngalitka ati mensia mayuh.

Tiang pengingat nya mandangka semilan gambar bujang berani dikena ngingatka pengawa ti udah dikereja sida ke udah bebadi lesi rambau beperang ketegal ngetanka Sarawak.

Tang, tinjau Utusan Borneo ba tugu kemari semina seiti gambar agi bisi dilekat ba tiang pengingat nya iya nya Datuk Patinggi Ali.

Direktor Dewan Bandaraya Kuching Utara (DBKU), Jumaini Haili maya dirandau kemari madahka lapan ari gambar nya udah ditingkilka DBKU.

Kebuah pia ku Jumaini bisi kes churi nyadi ba tugu nya ngujungka DBKU ningkilka dulu sebagi ari gambar dia.

“Ulah orang ke enchuri nya ngujungka sebagi ari gambar bisi rusak lalu kami ngaga pemutus ningkilka dulu sebedau ke dilekat manah agi.

“Ungkup gambar Datuk Patinggi Ali nya, iya digaga ari utai ke tusah ditingkil, nyadi kami ngelakka iya dia.

“Tang gambar bukai ditingkilka kami lalu diatur benung digaga manah agi sebedau iya ngelekatka baru,” ku iya.

Kenu ku Jumaini, ukai semina deka ngaduka gambar nya baru tang mega DBKU mega deka ngemanahka agi kandang tiang pengingat nya nengah Langgur Pemansang Malaysia Lumpar Ke- 11 (RMK11).

Pengawa ngemanahka Tiang Pengingat nya ku iya deka dipejalaika taun tu lalu diatu nyau deka tembu.

Berebak enggau nya, kelimpah digaga dikena ngingatka jasa bala bujang berani Sarawak ke udah begadai nyawa tugu nya mega sebengkah ari palan ke ulih matak penatai temuai raun ba mengeri besai tu.

Entara gambar bujang berani ke bisi dilekat ba tiang pengingat tu iya nya Datuk Merpati Jepang, Sharip Masahor, Pehin Orang Kaya Setia Raja Abang Manai, Rentap, Sawing , Liu Shan Bang, Datuk Patinggi Ali enggau Rosli Dhoby.