Perundingka baru ‘nisbah’ staf nitih bansa ba CPT, JTS Kuching
KUCHING: Parti Tindakan Demokratik (DAP) Sarawak ngansak perintah nengeri berundingka baru penyampau ‘nisbah’ staf nitih bansa lebih agi ba Pampang Pengerijista Tanah (CPT), Opis Tanah enggau Survei (JTS) Kuching.
Chairman DAP Sarawak ke mega Kaban Parlimen Bandar Kuching Chong Chieng Jen madah, nyau kelalu mayuh dokumen deka berijista ba CPT Opis JTS Kuching ketegal nisbah tauka komposisi bansa ke nadai sebela ba opis nya.
“Diatu bisi 24 pengereja pengawa, 17 nya bansa Melayu, enam Dayak, seiku India lalu nadai orang China ba CPT Opis JTS Kuching lalu betegalka pengerami Hari Raya Aidilfitri enggau bulan puasa, tebal agi pengereja pengawa bansa Melayu kemisi lalu nya nadai penanggul ba kitai laban sida sigi patut baka nya.
“Tang penanggul iya, ketegal enda sebela ba penyampau bansa lebuh sida kemisi, mayuh pengawa betangguh.
“CPT ba Opis JTS Kuching endang opis ke pemadu kiruh ba Sarawak,” ku iya rambau aum pemberita ba Opis JTS Kuching ditu kemari.
Chong ke mega Kaban Kunsil Nengeri (ADUN) Kota Sentosa madah, CPT Opis JTS Kuching nerima manggai 30,000 instrumen tauka 30,000 set dokumen pasal tanah ke deka berijista ninting taun.
Tambah mega, ba taun nyin aja, 28,000 instrumen ke sebaka dipindah, kaveat, pampas, tauka deka berijista.
“Nitihka kira rata sehari, CPT Opis JTS Kuching ngaduka 110 dokumen. Ninting hari mega, semilan staf bejalaika tanggungpengawa ngerijista dokumen, nya pan tusah sida deka nembuka pengawa nya dalam sehari.
Kekadang, kitai patut nganti dua ngagai tiga hari endur ngaduka pekara ngerijista dokumen. Kerani firma luyar enggau firma ke ngerijista ungkup mensia, bisi mega sida datai ke Opis JTS Kuching pukul 6 pagi laban deka tumu ngambi lumur sereta nentuka dokumen diri ulih tembu digaga sehari nya.
“Pekara tu lebih agi tusah diatur rambau puasa enggau pengerami Hari Raya Aidilfitri, laban semina bisi dua iku pemesai aja ke gawa, lalu tu nyadi kenyau dua minggu ke udah sebedau hari raya nyentuk diatu,” ku iya.
Pia mega, ku Chong ba pengawa ngaduka tanah, jam chukup beguna laban enti laun sehari dua ulih ngujungka sempekat dikinsil.
Ku iya, mayuh kes ba kort puntan lanan enda nitihka jam dalam sempekat.
“Ba orang ke bejual tanah, tentu sida deka duit jampat diberi tang enti tanah bedau berijista, sida enda ulih nerima duit. Tu mih nyadi seiti ari penanggul besai ke nyadi niting taun.
“Kitai chukup temegah meda ngelama tu pasal pengelantang bansa, pengelurus ngagai semua bansa dalam polisi perintaj, tang ba polisi ngambi staf ba JTS, terang amat enda adil,” ku iya.