Vaksin rabies di Sarawak chukup
KUCHING: Opis Menteri Pengerai Malaysia (KKM) nyangkal penerang dalam artikel ti madahka nadai vaksin anti-rabies di Sarawak sereta kebendar stok vaksin nya chukup.
Ketuai Direktor Opis Pengerai Malaysia, Datuk Dr. Noor Hisham Abdullah nengah penerang berita kemari madahka opis menteri nya endang seruran ngenukuka semua nengeri nyimpan stok minima vaksin rabies dikena nyikap diri nyema bisi maya nguna.
“Di Sarawak, Sepital Besai sarawak ( HUS) nyimpan stok vaksin nya dikena nyikap diri nyema bisi nyadi penyakit berampit ari rabies.
“Ke penerang semua, Sarawak iya nya nengeri ti nadai rabies nyentuk ngagai kes keterubah disahka kena 30 Jun 2017,” ku iya nengah penerang berita, dikena nimbal penerang artikel ke dipansutka ngena chara online ensanus.
Naka tu, penyampau vaksin ti diperolehi kenyau ari 1 ngagai 21 Julai 2017 bisi 2,043 vial lalu sepenyampau 4,517 vial deka diterima pun bulan Ogos 2017 ti ngujungka penyampau semua iya bisi 6,560 vial.
Nyema bisi peminta tambah vaksin sereta diguna enggau lengkas, vaksin ulih diambi dulu ari stok vaksin ari nengeri bukai di Malaysia.
“Bekal vaksin sepenyampau 6,560 tu chukup dikena ngubat 1,640 kes ketup ukui ke patut diberi vaksin (tiap kes diberi 4 kali tuchuk vaksin).
“Bepelasarka penyampau kes ketup ukui ti dipelabaka diatu, Opis Pengerai Nengeri (JKN) Sarawak agi bisi stok ke disimpan sereta chukup,” ku iya nerang silik dalam penerang berita nya.
Nambahka nya, KKM naka ke lemai kemari nadai kes baru diriputka, lalu status pemadu baru igi penyakit rabies iya nya lima kes nyadi ba mensia ke alai 4 kes nabanka nyawa enggau seiki kes benung diperubatka ba wad HUS. Kes nya diberi bantu enseput sereta agi raya.
Kelimpah ari nya, nitihka penerang berita ari Sekretariat Komiti Mutarka Penusah Ngenyit Nengeri Sarawak, ari timpuh 2 ngagai 22 Julai 2017 bisi 308 kes ketup baru udah ditemu ba bagi menua Serian enggau Sri Aman, ti nyengkaum 41 kes ketup di bagi menua Serian enggau 7 kes ketup ukui di bagi menua Sri Aman ke diriputka kemari.
Nya ngujungka penyam- pau semua kes ketup ukui kenyau 1 ngagai 22 Julai 2017 bisi 687 kes.
Bisi 419 iku orang udah datai nerima tuchuk vaksin nya, lalu opis pengerai benung ngiga sida ke bedau nerima tuchuk nya.
Ke penerang semua, naka ke diatu vaksin diberi ngagai kes ketup ukui enggau mayau ba kandang endur ke bisi igi penyakit nya ngerekai ti nitihka kriteria kritikal.
“Taja pan jelu ke dikesayau nya udah dituchuk vaksin, mensia mayuh dipinta ngambika enda ngelepas sereta anang bemain enggau jelu nya. Sida ke bisi kena ketup lebih agi ba kandang menua ke bisi igi penyakit nya patut berubat jampat,” ku Sekretariat Komiti Mutarka Penusah Ngenyit Nengeri Sarawak.
Naka ke diatu bisi 12,636 iku jelu ti nyengkaum 4,996 iku ukui, 7,595 mayau enggau 45 iku jelu bukai ba kandang menua ke bisi igi penyakit rabies udah diberi vaksin.
Opis Servis Veterinar Sarawak mega udah ngatur 94 kimpin penyedar pasal penyakit nya ba genturung pendiau enggau sekula ba kandang menua ke ditemu bisi igi penyakit nya, ti mungkur 18,320 iku pesereta.