Program pengelandik ungkup raban B40 deka suah diatur ba pelilih Serian
SERIAN: Program pengelandik ungkup raban orang ke dibaruh B40 deka suah agi diadu di Pelilih Serian.
Menteri Penguasa Pemayuh Pengereja Pengawa Dato Sri Dr Richard Riot Jeam madah program nya udah nerima sambut ke manah ari peranak di Pelilih Serian kelebih agi ba pengelandik bejait.
“Aku udah berandau enggau pemesai opis menteri, enti kitai majakka program pengelandik tu, program tu deka suah agi diadu di Pelilih Serian,”ku iya.
Riot mansutka jaku nya ba Pengerami Makai Lemai Begulai enggau Kaban Biro Orang Indu Pelilih Serian di Balai Besai Kampung Rasau, Serian malam ensanus.
Riot nambah, ari penyampau semua program pengelandik ke bisi diatur ngelama ke udah, 95 peratus diatur di Pelilih Serian.
“Program pengelandik bejait, nyumai, ngaga kuih sereta ke bukai, 95 peratus diatur di Pelilih Serian,’ku iya.
Pengerami malam nya digulu urung 1,500 iku kaban orang Indu ti ngarika 10 bengkah gerempung ngelingi Serian ke diatur Majlis Pembangunan Wanita dan Keluarga (MPWK) Pelilih Serian.
Ngenang kaul ke sama, Riot ke mega Kaban Parlimen(MP) Serian madah program nya mudah diatur di Serian ketegal peranak pelilih nya udah meri sukung ke tegap ngagai Barisan Nasional( BN) kelebih agi orang indu.
Ba pengerami nya mega, Riot bisi ngemata pengawa nyuaka surat ‘ tawaran’ kereja ari Total Reliability Sdn Bhd ngagai Elisa anak John iya nya indai dua iku diri menyadi(Jackson Mazlan enggau Monica Mazlan) ari kampung Paon Serian ke nyadi mansa sakit rabies bedau lama tu tadi.
Bantu kereja nya diberi asil pinta Riot ti keran mantu sida sebilik kelimpah bantu belanja ngaga rumah dulu agi ari tu.
Bela datai Chairman MPWK Serian Jenny Jita anak Eyir, Sekretari Politik (Rio), Datuk Mejar(B) Peter Runin enggau orang bukai.