Jawing: Chukup mayuh pemaik nyadi kaban KWSP
Penemu mensia mayuh ti agi kurang pasal pemaik KWSP ngujungka licha bisi diatur ninting bulan
KUCHING: Kebendar mensia mayuh agi kurang bendar penemu sentang penguntung nyimpan duit tauka nyadi kaban KWSP (Kumpulan Wang Simpanan Pekerja) kelebih agi sida ke diau dI menua pesisir sereta menua ulu.
Menijar Servis Penguna KWSP Pampang Sarawak, Jawing Nayang madah KWSP bisi nyendiaka mayuh inisiatif, baka numbuhka tim mobil (tim ke nurun ngangkatka licha pasal KWSP ngagai menua pesisir) ninting bulan.
Naka kediatu, inisiatif KWSP ngaga pengawa pemandang mungkur pelilih menua mit di Sri Aman, Betong, Saratok, Sarikei, Sibu, Bintulu, Miri, Lawas.
“Ukai semina penguna menua pesisir aja ke kurang penemu pasal KWSP, ba mengeri pan bansa nya,” ku Jawing madah lebuh dirandau pengudah meri licha pasal pekara Pinchin Begulai enggau KWSP di sebenglah palan bebeli barang ditu, kemari.
KWSP ngaga pengawa pemandang nyengkaum ngaga licha pasal ‘ Licha Pekara Pinchin Begulai enggau KWSP’ dalam kandang dua hari 22-23 Julai, ti dipenyadika Menteri ba Opis Kepala Menteri ( ngarika Kepala Menteri Datuk Amar Abang Johari Tun Openg), Datuk Talib Zulpilip ba palan ke sebaka.
Sama bisi ngulu licha nya, AKPK (Agensi Kaunseling dan Pengurusan Kredit) nyengkaum See Hua Group.
Iya madahka, mensia mayuh semina beguai datai ngagai KWSP enti sida iya deka ngeluarka duit pinchin diri (tabung seiku-seiku ke ulih dikeluarka sekeda penyampau maya umur manggai 50 taun tauka lebuh manggai 55 taun) tauka enti sema bisi pemati diri sebilik tauka begunaka duit simpan dikena mayar ungkus perubat sepital.
“Taja pan nuan nya kaban KWSP, tang enda nemu penguntung tauka sukung ke ulih diberi KWSP. Ambika chunto, baka ngeluarka duit, ukai nya endur ngeluarka duit simpan KWSP kitai aja, KWSP mega nyendiaka bantu, sukung sereta penguntung bukai.
“Taja pan, kitai ngeluarka semua duit kitai dalam KWSP, tang penguntung ba kitai. Ambika chunto, baka ngeluarka duit simpan dikena meli rumah, mayar lon ba bank dikena ngurangka lon nya.
“Mayuh orang enda nemu pasal KWSP ulih ngeluarka duit dikena mayar utang, tu pan ulih diambi ari KWSP. Beri penyampau ngagai kami, KWSP deka meri penyampau nya ngagai kita,” ku iya.
Kelimpah ari nya, kaban KWSP mega ulih muka akaun sida iya enggau KWSP nengah i-akaun.
“Muka i-akaun muntang digaga, laban lebuh kita bisi iakaun, semua penyata ditemu kita magang nyengkaum nukar penama (peturun) kita enti sema bisi pemati.
“Sida ke deka muka i-akaun tauka ngelawa kiosk kami (KWSP) tauka ngagai kaunter kami ngerijista kita empu, tauka ngaga nengah ‘online’ kediri empu nengah telefon CMC (Call Management Centre) di Kuala Lumpur, ngena lumur 03-8922 6000, sida iya deka mantu kita bakani deka ngerijista, nyengkaum meri kita kod masuk sereta kod aktif,” ku iya.
Ba seiku penguna ke sempat dirandau ba licha nya kemari, Wilda anak Losan, beumur 55 taun madah mayuh amat penguntung ari KWSP.
“Tang mayuh kitai ke diau di genturung pendiau tauka di kampung enda entu nemu pasal KWSP, pengawa KWSP, tauka kekadang sida ia baka ke enda ibuh pasal KWSP.
“KWSP mayuh mantu kitai ari sukut pengawa besekula, meli rumah, enti bisi ditinggang penusah, asal kitai bisi nyimpan ditu. Ba aku, KWSP
Ukai semina penguna menua pesisir aja ke kurang penemu pasal KWSP, ba mengeri pan baka nya. Jawing Nayang Menijar Servis Penguna KWSP Pampang Sarawak
mayuh mantu,” ku iya.
Wilda ke kala gawa nyadi pemantu ba palan sekula anak mit 20 taun ke udah, agi mengkang nyimpan taja pan diatu nadai agi gawa.
“Manah penerang pasal KWSP, pemerat baka tu ke deka dikunsi aku enggau bala kaban aku di kampung,” ku iya ke diau enggau sida sebilik di Taman Malihah.