Riot meransang pengundi Serian terus nyukung BN
SERIAN: Sukung ke tegap ngagai Barisan Nasional (BN) ba tiga sitak kunsil nengeri ditu rambau pengawa bepilih nengeri ke udah meseti ditampung ba pengawa bepilih parlimen ti deka datai, Ku Menteri Penguasa Pemayuh Pengereja Pengawa Dato Sri Dr Richard Riot Jeam.
“Aku puas ati ketegal tiga sitak kunsil nengeri ke dikuasa Parlimen Serian udah diempu BN.
“Kitai (BN) ukai semina menang, tang udah menang nengah majoriti ke besai,’ku Riot ba Pengerami Makai Lemai Begulai enggau Kaban Biro Orang Indu Pelilih Serian di Balai Besai Kampung Rasau, Serian malam ensanus.
Berindik enggau nya, iya ke mega Kaban Parlimen (MP) Serian ngelalau semua peranak Serian negapka kaul sereta sukung ngagai BN.
Ku iya, pengawa bepilih parlimen deka diatur dalam timpuh ke semak lalu semina Menteri Besai(PM) aja ke nemu maya ke endar.
“Aku nemu sekula, pengajar enggau pemesai perintah udah diberi latih enggau penerang sentang atur ngintu pengawa bepilih.
“Sapa ke nyadi chalun Serian aku pan enda nemu ke alai pemutus nya dilempaika ba PM.
“Sekalika aku nyadi chalun tauka enda, nya pan dilempaika ngagai PM.
“Tang aku ngarap, dikena kitai nampung pemanah rikut BN, aku arap diberi peluang bediri sekali agi,’ku Riot ke udah nyadi MP Serian pengelama enam renggat.
Ba umur ke udah manggai 66 taun Ku Riot, semengat meri servis ngagai bansa kelebih agi ngagai peranak serian seruran tinggi baka selama.