FELCRA deka terus nyadi ejensi KPLBW nyaup nyungkak penatai pemisi rayat
KUCHING: FELCRA deka terus nyadi ejensi ba Opis Menteri Pemansang Menua Pesisir enggau Kandang Menua ( KPLBW) nyaup nambah penatai pemisi peranak menua pesisir.
Sapit Menteri KPLBW Datuk Alexander Nanta Linggi madah FELCRA mega bisi kaul enggau pengawa nanam sawit tauka komodoti bukai.
“FELCRA udah lama di Sarawak sereta udah nyaup ngangkat ekonomi Sarawak enggau menua.
“Tanggungpengawa FELCRA mega kitai puji, iya nya nyadi ijinsi dalam opis menteri ti nyaup ngemujur tetiap program ungkup pengelantang rayat menua pesisir,’ku iya.
Alexander mansutka jaku nya ba aum pengarang berita pengudah ngulu Pengerami Ramah Tamah Aidilfitri enggau Ngiling Bidai 2017 KPLBW di Hotel Pullman ditu, kemari.
Iya nambah, FELCRA mantu ba program bantu rumah baikka nya ba atur ngaga rumah baru tauka ngemanah rumah.
“Tiap taun Opis Menteri Pekara Wang mantaika bajet ba parlimen nengah KPLBW dikena mantu raban orang ke dipilih.
“Kitai deka meri bantu ngagai orang ke begunaka rumah nengah Program Berumah Rayat Seranta(PPRT),”ku iya.
Iya ke mega Kaban Parlimen Kapit mega madah kelimpah meri bantu ba pengawa berumah, FELCRA mega mantu nyendia perengka guna bukai.
FELCRA mega mantu ngaga jalai alun di menua pesisir lalu nyadi ijinsi dalam KPLBWngelantangpengidup rayat, tandu Alexander.
Ba aum pengarang berita nya, Ketuai Pemesai Operasyen (COO) FELCRA zainal Abidin Sharif madah sekeda kandang endur di Sarawak udah dikelala nyadi palan endur ngemansut pemakai.
Ku iya palan nya deka dikemansang FELCRA lalu randau begulai enggau ketuai Perintah Nengeri sentang pekara nya udah mega diadu.