Maya Ngiling Bidai anang semina berami aja tang perundingka isu ke ditapi Dayak
KAPIT: Sapit Menteri Pemansang Menua Pesisir enggau Kandang Menua Malaysia Datuk Alexander Nanta Linggi madahka Pengerami Ngiling Bidai Gawai Dayak nyadi sebagi ari pengawa asal bansa Dayak ti patut dirami.
“Peratika iya ari sukut positif laban iya nyediaka awak berami begulai nentuka pemanah tanggam kaul antara kitai kelebih agi di Kapit ditu,” ku Nanta lebuh bejadika Pengerami Ngiling Bidai Gawai Dayak 2017 ti diatur Gerempung Bansa Dayak Sarawak ( SDNU) Pampang Kapit bepalan di Balai Sri Baleh, apin lama ke udah.
Ku iya, lebuh kitai ngatur pengerami (ngiling bidai) tu, kitai anang semina berunding deka berami aja, tang kitai patut berundingka pekara ti meri pemaik.
“Kitai tau bejuraika sekeda isu ti mangka kitai. Baka ti baru disebut chairman SDNU, Joseph Jinggut, sentang Pulau Galau (PG) enggau Pemakai Menua (PM).
“Aku minta SDNU di Kapit ngatur forum tauka randau bejuraika dua bengkah isu tu laban tu maya ti engkeman berandauka iya berindik ari Perintah Nengeri benung mutarka pekara tu.
“Sapit Kepala Menteri Datuk Amar Douglas Unggah udah dilempaika pengandal mutarka isu bekaul enggau tanah bansa asal,” ku iya nerang.
Nangkan nya ku Nanta, isu PG enggau PM ngembuan mayuh macham reti jaku, sekeda menua nyangka bisi reti ti bebida. Baka nya kitai di Batang Rajang, bisi reti jaku diri empu lalu pia mega di kandang menua Betong enggau Saribas, nyangka jauh bebida. Komuniti Orang Ulu mega baka nya. Abis nadai, kitai bansa Dayak meseti bisi ‘input’ ari mayuh komuniti Dayak. Nya alai, ‘input’ tu deka pulaika pemaik ngagai komuniti Dayak mutarka pekara PM enggau PG begulai enggau perintah.
Ba penemu Nanta empu, nyadi bansa Dayak ti datai ari Rumah Unyat di Ulu Sungai Merirai, Baleh lalu besai diau di rumah panjai, iya endang mereti endar konsep PM enggau PG.
Ku iya, iya endang bediri tegap ba pekara komuniti Dayak ti minta hak sida ba PG enggau PM laban nyadi sebagi ari pengidup enggau adat, ngetanka pesaka asal sida ti dikembuan kenyau ari menya.
“Enti nitih enda patut bisi sebarang pengawa betalatka Dayak bisi hak ba PM enggau PG. Aku ulih meretika konsep PM enggau PG kemaya hari, kitai enda ulih ngempu iya nadai betatak. Aku setuju senentang pekara tu.
“Aram kitai ngira (banci), kitai ulih setuju nama reti pemesai enggau pekara dipesetujuka komuniti Dayak enggau perintah. Tang nadai seiku kitai tau nyebut, Dayak tu nadai hak.
“Aku dekaka perintah ngaku hak kitai ba PM enggau PG. Kelimpah ari PM, kitai ulih besetujuka sekeda pemesai bungkur ti diterima komuniti Dayak enggau Perintah. Kitai tau berandauka pemesai iya,” ku iya nyemetak.
Ngelansa pasal politik, Nanta madahka kenyau ari dua taun ke udah, bala sida udah ngemaduka isu politik. Bala pengari rayat sekalika datai ari Parti Rakyat Sarawak (PRS) tauka Parti Bumiputera Bersatu (PBB) begulai enggau parti komponen Barisan Nasional (BN) ke bukai, Parti Sa’ati Rayat Sarawak (SUPP) enggau Parti Demokratik Progresif Sarawak (SPDP), bela mai pemansang ngagai Kapit.
“Pengari rayat endang gawa ngemansangka Kapit enggau pemansang infrastruktur sereta program ekonomirama ke bukai ngambika rayat ulih ngasaika pengelantang sebaka enggau peranak di kandang menua bukai.
“Pia mega, aku ngelalau peranak ditu anang alah asut piak ari luar,” ku iya.
Ngelansa pasal penemuai Kaban Parlimen (MP) Seputih, Teresa Koh, ari Parti Tindakan Demokratik (DAP) ngagai Katibas, Song enggau Kapit apin lama ke udah, Nanta madahka diri berasai asa endar ngenang tuduh digaga Teresa.
“Nyangka iya semina diau bemalam sehari tauka dua hari aja lalu ngabas semina sebuah tauka dua buah rumah panjai lalu mansutka tuduh madahka perintah enda ngintu pengelantang rayat memanah. Teresa mega nuduh pengari rayat nadai bejalaika sebarang pengawa mantu rayat.
“Iya bejakuka sambung jalai Kapit-Song enggau Kanowit ti enda berurun, tang iya enda sedar tauka enggai nemu jalai nya apin tembu digaga. Jalai tu benung digaga, tang Teresa bekelikuhka pekara ti amat enggau tuduh bula ngagai pengawa perintah.
“Penembu jalai (Jalai Kapit- Song- Kanowit) standard R3 tu ila nyadi jalai ti menyana. Jalai ti ditengah enggau dipejah iya nya jalai batang sereta enda likun kelebih agi antara Song enggau Ngemah, sekeda jalai ti diempu orang ngatika diri. Nya kebuah mensia mayuh dilalau betengahka jalai nya dulu laban ngenggaika jalai sida ditengah mensia mayuh, kandang kebun sida,” ku Nanta nerang.
Ku iya, kaban DAP nadai meri penerang silik ngagai Teresa pasal jalai ti benung digaga enggau jalai ditengah sida jalai peribit, baka ti dituduh ba Facebook.
“DAP patut sedarka aku enggau pengari rayat ke diatu semina udah gawa lima tauka enam taun ke udah. Perintah ari baruh pegai Menteri Besai udah ngagihka belanja RM800 juta dikena ngaga jalai.
“Endang enda patut endar Teresa ngena isu jalai tu ngerachun runding rayat begedi enggau ngelaban perintah. Aku nemu kebuah sida seruran nguji ngemai rayat ngelaban perintah laban sida puntan runding meda jalai nyauka tembu digaga.
“Bala sida nadai agi pekara bukai nyadika isu laban endang nadai kala gawaka rayat. Sida semina nemu nyabung laya. Perintah diatu beratika isu, mutarka penanggul sereta ngamatka semaya ngagai rayat.”
Ngelansa pasal pengerami nya, Nanta bisi ngemendarka geran perintah ungkup aktiviti rama penyampau RM10,000 ngagai SDNU, RM10,000 ngagai Serakup Bansa Orang Ulu (OUNA) sereta RM 10,000 da agi ngagai Serakup Dayak Iban Sarawak (SADIA).
Kaban Kunsil Nengeri (ADUN) Bukit Goram, Jefferson Jamit Unyat mega bisi ngemendarka geran RM10,000 ngagai OUNA, RM5,000 ngagai Raban Indu OUNA sereta RM5,000 ngagai SDNU nyadika bantu peransang pelajar.
Bisi 400 iku datai ngulu pengerami nya. Sekeda ari bala ke bisi datai ADUN Bukit Goram Jefferson Jamit Unyat, Sekretari Politik Kepala Menteri Sarawak Tapah Ata, bala ketuai opis perintah enggau ketuai raban bansa sereta bala ke bukai.