Kes rabies: JBN mantaika penerang ninting hari
Kebendar ripot pemadu baru pasal rabies deka dikeluarka JBN ninting hari kena pukul 5 lemai
SIBU: Mensia mayuh tau betanya ngagai Komiti Penusah Ngenyit Nengeri (JBN) nyema deka nemu silik penerang pemadu baru bekaul enggau penyakit rabies di nengeri tu.
Menteri Muda Pengawa Berumah enggau Pengerai Mensia Mayuh Dr Annuar Rapa’ee madah mensia mayuh dilalau anang jampat arap ngagai berita ti ditabur nengah media rama sebedau dituku pengamat.
“Kebendar, ripot pemadu baru pasal rabies deka dikeluarka JBN ninting hari kena pukul 5 lemai.
“Penerang bukai kelimpah ari nya enda ulih dipechaya. Nya alai aku ngelalau mensia mayuh ngambi mending ari penerang ti ulih dipechaya. Sebarang penerang ari media rama baka Facebook, anang jampat pechaya,” ku iya lebuhka dirandau pengarang berita pengudah bejadika Pengerami Ngabang Aidilfitri Masjid An-Nur Sibu di Balai Lakis ditu, malam kemari.
Iya mansutka jaku tu lebuhka ditanya senentang pengamat ripot bekaul enggau pengelekai igi penyakit rabies di Sibu baka ditabur ba media rama Facebook enggau Whatsapp kandang sekeda hari ke udah.
Penerang nya madahka bisi ukui di kandang Jalai Oua Batu 6 ngagai 8 dirampit rabies lalu minta mensia mayuh bejejaga kelebih agi peranak di kandang genturung pendiau Desa Satria, Bumi Indah enggau Jalai Bougenvilla.
Penerang nya mega madahka bisi sekeda orang nadai tanggungpengawa udah muai bangkai ukui ke dalam sungai lalu ngelalau mensia mayuh enda meli tauka makai ikan ari sungai dalam timpuh dua minggu.
Berindik ari nya, Dr Annuar ke mega Menteri Muda Pelajar enggau Pemansik Teknologi empu enda pechayaka penerang nya laban dataika sehari tu (malam kemari) iya nadai nerima ripot ari sebarang ejensi bekaul ngenukuka pengamat penerang nya.
“Enti ukai ari JBN, aku empu enda pechayaka penerang tu, kelimpah aku udah dipadahka piak JBN,” ku iya.
Nangkan nya, Kaban Kunsil Nengeri (ADUN) Nangka mega madahka ngagai mensia mayuh pengelekai rabies semina tau berampit maya diketup ukui gila.
Ku iya, ketup ukui gila ukai reti lalu dirampit rabies.
“Taja diketup ukui gila, ukai reti 100 peratus orang nya deka dirampit rabies. Tang nyema abi ketup dituchi beresi lalu ditucuk vaksin empat kami, 99 peratus iya deka ulih diperubat.
“Tang nyema diketup ukui lalu nadai berubat nitihka pematut sereta ngayanka kelai rabies, bala kita deka mar diperubat,” ku iya.
Nya alai, iya ngelalau mensia mayuh ngambika seruran bejejaga lalu nyeliahka diri ari diketup ukui maya diatu.
Penerang bukai kelimpah ari nya enda ulih dipechaya. Nya alai aku ngelalau mensia mayuh ngambi mending ari penerang ti ulih dipechaya. Sebarang penerang ari media rama baka Facebook, anang jampat pechaya. Dr Annuar Rapa’ee Menteri Muda Pengawa Berumah enggau Pengerai Mensia Mayuh