BDCF diatur ukai semina ungkup temuai menua luar
Tuju kebendar ngambi semua orang ngelala pengelebih, penyelai enggau pengaya adat pupu bansa di S’wak
SIBU: Program mandangka main asal enda semina diatur ngambika ditemu temuai ari menua luar tang bela patut ditemu rayat ditu empu lebih agi nembiak rebak baru.
Sapit Menteri Pemansang Menua Pesisir Enggau Kandang Menua Datuk Alexander Nanta Linggi madah, ambika banding baka Pengerami Mantaika Main Asal Borneo (BCF), sebengkah pengerami ti engkeman bendar diatur alai mandangka pengelebih, penyelai enggau pengaya adat enggau main asal pupu raban bansa di nengeri tu.
“Tu awak alai kitai mantaika main asal diri ti ukai semina patut dipandangka ngagai temuai menua luar aja tang mega beguna bendar ditemu bala anak kitai ke rebak baru.
“Ditu sida deka meda sereta belajar nama bagi main asal ke dikembuan pupu raban bansa ditu,” pia ku iya madah maya bejadika panggau Pengerami Mantaika Main Asal Dayak Borneo (BDCF) 2017 di Dataran Bandar Sibu Fasa I ditu, lemai kilah ensana.
Sama bela datai maya tu iya nya Kaban Kunsil Nengeri ( ADUN) Dudong Datuk Tiong Thai King, ADUN Bukit Goram Jefferson Jamit Unyat enggau Chairman Komiti Pengatur BDCF 2017 Paulus Dandee Banyang sereta bala bukai.
Berebak enggau tu mega, Nanta madahka nengeri Sarawak dikelala enggau pengelikun ti dikembuan rayat taja enda sebaka bansa tauka jalai pengarap.
Tu ku iya disempulang enggau penyelai sereta pengaya adat enggau main asal rayat enti dibida enggau nengeri bukai di Malaysia ditu.
“Kitai ditu enggau ati ti temegah naka alah ngetanka pengelebih tauka pengeraja ke dikembuan kitu tu,” ku iya madah baru.
Iya ti mega Kaban Parlimen Kapit maya tu sekali agi madahka BCF ke diatur nya nyadika menalan alai rayat di Sibu tauka menua bukai begempuru enggau pangan diri seraya ke meda pengerami tauka program ke bisi diatur.
“Serak tu, BCF udah diatur 14 taun. Ninting maya diatur kitai meda palan alai ngatur pengerami tu semampai dedat enggau penatai mensia mayuh.
“Reti iya, BCF beguna bendar digaga laban pengerami tu nyadika pengering nyintalka kaul pupu raban bansa ukai semina rayat di Sibu aja tang mega rayat ari menua bukai,”
Ditu sida deka meda sereta belajar nama bagi main asal ke dikembuan pupu raban bansa ditu. Datuk Alexander Nanta Linggi Sapit Menteri Pemansang Menua Pesisir Enggau Kandang Menua
pia ku iya madah.
Maya pengerami tu, Nanta bela bisi nyuaka geran ngagai gerempung, rumah panjai enggau sekula.
Mensia mayuh ti bisi datai dipandangka enggau macham bengkah adat sereta main lama baka ajat Iban, ‘Naga Berua’ (Gerempung Orang Ulu Sibu) enggau ajat asal (Gerempung Dayak Bidayuh Sibu).