Kaban KWSP ulih ngambi duit ari akaun 2 dikena ngentak baru ba rumah panjai
KUCHING: Kumpulan Wang Simpanan Pekerja ( KWSP) Pampang Sarawak ngemendarka kaban KWSP ngeluarka duit simpan akaun 2 sida dikena ngentak rumah baru ba rumah panjai tauka genturung pendiau.
Menijar Servis Penguna KWSP pampang Sarawak, Jawing anak Nayang madahka, ngaga bilik tauka rumah baru dikumbai ‘Village House Withdrawal’ tang semina ngemendarka ungkup bilik baru aja.
“Pemendar nya semina dikena ngaga rumah/ bilik baru aja, ukai kena nampung ( renovation/ extension).
“Lalu tanah endur berumah nya enda tau enda bisi geran tauka surat tanah, atas nama diri empu tauka nama laki tauka bini, ukai ngena nama menyadi tauka kaban belayan bukai.
“Ungkup rumah panjai, tuai rumah tauka penghulu enda tau enda meri pemendar enggau atur ke berat iya nya, orang ke deka nampung bilik dia enda tau enda orang asal ( apai indai, aki ini) dia empu,” ku Jawing.
Iya madah munyi nya lebuh dirandau pengudah meri licha KWSP ngagai mensia mayuh ba sebengkah palan bebeli barang ditu, kemari.
KWSP udah ngatur pengawa pemandang meri licha ngagai mensia mayuh pasal KWSP ari 22- 23 Julai, ti dipenyadi Menteri ba Opis Kepala Menteri Datuk Talib Zulpilip kena 22 Julai tu tadi.
Iya madahka duit KWSP ulih diambi enti semua atur nadai penanggul.
“Pengabis kurang pemun pengawa nampung bilik di rumah panjai udah berengkah, tiang udah didirika, udah bisi atap, dinding baru ulih ngeluarka duit simpan nya ari Akaun 2.
“Enti sema kitai empu ngaji orang bukai ngaga bilik tauka rumah nya, enda tau enda bisi bukti bill, resit meli perengka guna, lalu meseti bisi sempekat kitai ngaji orang nya ngaga,” ku iya.
Taja pia, Jawing madah timbal ari orang rumah panjai tauka kampung sigi enda mayuh dikemendarka lebuh minta pemendar ngeluarka duit simpan sida iya ngaga bilik tauka rumah di genturung pendiau.
“Laban mayuh rumah panjai tauka kampung, agi mayuh ke bedau diberi surat pala tanah.
“Nyengkaum sida ke datai ari rumah panjai, sida iya enda tau enda mantaika surat pala tanah endur berumah tauka ngentak baru.
“Ambika chunto, seiku tuai rumah enda tau enda netapka orang ke deka berumah tauka nampung bilik nya sigi nembiak iya lalu ngemendarka orang nya berumah dia,” ku iya lalu nandu baru bisi pom ke patut di isi ba opis KWSP, bekait enggau ngambi duit simpan kena ngaga bilik tauka rumah panjai.
Kekadang ku iya, Opis Tanah enggau Survei ( L& S) ulih endur nanya enti sitak nya udah di kelai tauka bedau, nyema orang nya deka nemu enggau silik agi.
Nangkan nya, ku iya, udah abis ngisi pom, orang ke minta ngaga bilik tauka ngaga rumah panjai enda tau enda ngambi gambar iya empu enggau tuai kampung tauka penghulu, begambar ba mua rumah panjai ke deka alai berumah.
“Minta pemendar ngaga bilik tauka rumah baru di genturung pendiau tu ukai semina ke Dayak aja, tang Melayu, China sama tau minta, asal semua atur nya dititih” ku iya.