Karnival Mini Dagang Mikro Pengelantang Zon Tengah deka dipasuk 50 iku pesereta

SARIKEI: Bisi 50 iku penerima bantu pengelantang ari Bagi Menua Sibu, Sarikei, Kapit, Mukah sereta besemak Pelilih Saratok deka ngambi bagi dalam Karnival Mini Dagang Mikro Pengelantang Zon Tengah ti deka diatur di Balai Makit Besai Sarikei ditu, berengkah ari 28 ngagai 30 Julai tu.

Tuju karnival tu dikena nyediaka pelasar ngagai bala pesereta ngelaku enggau nyual produk sida, ku Pemesai Pengintu Pengelantang Bagi Menua, Tang Kee Lee, rambau aum pengarang berita di opis iya, kemari.

Kelimpah ari nya, tuju ke bukai deka mantu pesereta ngemesaika rentayan makit sida, meransang mensia may- uh ngambi latih pengelandik nyadi jalai enggau tuju iya ngiga belanja lebih sereta nyediaka pelasar pengawa besilih penemu dikena ngangkatka tikas pemanah produk sida.

Bemacham aktiviti enggau program pemerindang begulai enggau sekeda artis menua tu bisi dirintai kena matak penatai mensia mayuh ngulu palan karnival tu, ku iya.

Rintai aktiviti diungkupka 28 Julai iya nya pekit nyura ngagai orang nyelai pendiau (OKU), ‘Sarikei Got Talent’ sereta pengawa beperindang begulai enggau Ricky El enggau Eyqa Saiful.

Atur program nyerumba pengawa bejadi muka ti deka dipenyadika Menteri Muda Perambu Mengeri, Pengatur Tanah enggau Rampa Menua, Datu Len Talif Salleh, kena 29 Julai, iya nya Pekit Ratu Kebaya, Pekit Fasyen Fairy Tales Nembiak Mit, panggau pemerindang ulih Masterpiece sereta Florence Lo.

Pekit belagu ungkup orang tuai tauka ‘Sinaran Emas’ enggau Anugerah Karnival UMK Mini deka nyadi batang pengerami ba hari kepenudi karnival, 30 Julai.

Barang sapa ka ngambi bagi ba mayuh bengkah pekit dilalau betanya nuju Opis Pengintu Pengelantang Bagi Menua Sarikei ba lumur 084-651005/651951, ungkup pengawa rejista tauka deka nemu penerang silik.