Pemanah rampa menua Sarawak engkeman digaga palan merindang
Ambika banding kitai ulih ngaga ‘ Taman Tema’, ‘casino’ baka ba Tunuh
SIBU: Penemu ti landik ngemanah sereta ngemayuhka agi produk dagang temuai nyadika pengering nengeri tu matak mayuh agi penyampau temuai datai.
Kaban Kunsil Nengeri (ADUN) Tamin Ir Christopher Gira Sambang madah, ambika banding nengeri tu tau bendar ngaga palan merindang tauka ‘Taman Tema’ enggau ‘casino’ seririh enggau gaya rampa menua ke manah ditu.
“Kitai ulih ngaga ‘Taman Tema’ enggau ‘casino’ baka ba Tunuh.
“Produk baru baka tu ulih nyungkakka agi penyampau temuai datai ngagai nengeri kitai.
“Tang tu penemu aku kediri. Digaga tauka enda nya bepanggai ba pemutus perintah,” pia ku iya madah maya datai bejadi Pekit Nyumpit beserimbai enggau
Tang tu penemu aku kediri. Digaga tauka enda nya bepanggai ba pemutus perintah. ADUN Tamin Ir Christopher Gira Sambang
Pengerami Mantaika Main Asal Dayak Borneo (BDCF) 2017 ba Dataran Bandar Sibu ditu, kemari.
Sebedau tu, perintah ngembuan juluk ati deka ngemansang Sungai Tunoh iya nya ba pelilih Bukit Mabong di Kapit nyadi ‘Food Basket’ nengeri tu iya ke nyadi ekodagang temuai sitak tengah dalam kandang 15 taun ti deka datai.
Nambahka penemu iya, ku Gira, ambika banding ba menua Singapo taja menua mit tang nyadi menua ke tebilang alai nemuai ketegal ti bisi palan pemerindang baka ‘casino’ ba Resort World Sentosa enggau Marina Bay Sands kelimpah ‘ Taman Tema’ Universal Studio.
Ba pekara bukai, pekit nyumpit nya kemari diatur Gerempung Nyumpit Sibu begulai enggau Opis Dagang Temuai sereta ejensi dagang temuai.