MPB semina nerima lada ti manah dikena ngetanka kualiti Lada S’wak
KUCHING: Opis Komiti Lada Malaysia (MPB) enda sengapa nulak lada ti dibai bala pekebun ngagai opis sida.
Chairman iya, Tan Sri William Mawan Ikom madahka MPB semina nerima tauka meli lada ti manah ari pekebun lada bepelasarka gred ti udah dikemendar aja dikena nentuka Lada Sarawak meruan bisi kualiti.
Iya mega nerangka MPB, ditumbuh dalam taun 2007 dikena nyilih Opis Komiti Makit Lada, ukai semina ngaul ba pengawa nyual enggau meli lada aja tang mega nyengkaum pengawa ke bukai baka ngintu, matau enggau ngemansangka industri lada di menua tu.
“Kitai nulak bepelasarka kualiti, tebal agi kes ditulak tu laban lada agi mayuh ruman enggau kurang rangkai. Pengawa ti digaga kami, minta sida ti nganjung iya baru pengudah lada nya beresi diruman.
“Tu ukai peminta (tauka atur) ngagai bala pekebun ti bejualka lada ngagai kami. Pengawa meli lada diatu semina nyadi sebagi ari pengawa kami, mantu ngenegapka rega lada dalam makit. Penguntung ulih MPB dalam makit semina 20 peratus aja seraya sektor peribit nyengkaum orang dagang enggau pengimport nguasa 80 peratus ari penyampau eksport,” ku iya lebuhka dirandau.
Iya mega pechaya mayuh orang agi ngumbai MPB tu sebengkah ejensi ari baruh Opis Menteri Kebun Dandang Besai enggau Komoditi Malaysia, sebaka enggau Opis Komiti Makit Lada sebedau tu laban pekara ke alai pangku pengawa iya besai agi kemaya hari tu.
“Anang nyalah kami laban nulak (lada kita). Kami semina nyaup kita bisi pilih ke bukai, tang kami di MPB meseti ngetanka tikas kualiti tinggi nentuka makit Lada Sarawak meruan, ti dikelala di serata dunya. Kualiti lada kitai bebida ari menua pemansut lada ke bukai,” ku Mawan.
Ba lansa ke bukai, Direktor Besai MPB, Dr Harry Entebang, madahka sistem meri gred opis kaunsil nya diakun lalu sida bisi penguji ti nguji lada bepelasarka tekstur iya.
Iya nyemetak madah ambika chunto, MPB enda ulih ngambi buah lada ‘moldy’ kenyau ari iya deka ngelekai ngagai buah bukai.
Senentang tuduh ti madahka MPB udah natak belanja meli lada ari pekebun, ku Harry pekara nya bula lalu iya madahka MPB baka ejensi ke bukai meseti nitihka atur perintah.
“Baka selama, kami deka minta pekebun, nyema sida setuju nyual ngagai kami, taja enti sema begunaka sekeda hari endur mayar laban nitihka atur. Nyema sida setuju, kami ngambi lada sida tang nyema sida enda setuju, sida tau ngelawa orang dagang ke bukai.
“Bisi maya, begunaka timpuh ti lama endur maya laban ketegal atur belanja, lalu nganjung belanja ngagai menua ulu nyangka begunaka timpuh ti panjai agi,” ku iya nerang.
Iya nyamin MPB seruran deka nyaga pemerat pekebun lada, tebal agi pekebun mit ti nanam utai tanam komoditi ba tanah sida empu.