Nadai bepilih bulu mutarka penyakit rabies
Pekara ke dikemeratka iya nya ngidupka nyawa lalu kitai nadai bepilih bulu dalam pekara tu
KUCHING: Nyawa mensia pemadu dikemerat sereta nadai pilih bulu ba atur pengawa mutarka penanggul penyakit ukui gila tauka rabies ke nyadi di nengeri tu.
Pekara nya dipadahka Sapit Kepala Menteri ti mega Chairman Komiti Mutarka Penusah Ngenyit Nengeri Sarawak, Datuk Amar Douglas Uggah Embas.
Iya bepenemu ulah sekeda orang ti baka deka nyadika penyakit tu ke main politik, nya endang enda patut laban semua piak chukup bebendar deka mutarka penusah nya lalu ngenukuka penglikun enggau pengerai raban bansa.
“Pekara ke dikemeratka kitai iya nya ngidupka nyawa, kitai nadai bepilih bulu dalam pekara tu.
“Nyema orang nya ngumbai kitai bisi ngaga bepilih bulu ngagai iya, aku ngasaika orang ngembuan runding ti enda manah.
“Kitai ngidupka nyawa, kitai nagang penyakit tu (ari terus nyadi),” ku iya lebuh ke ditanya bekaul enggau isu penyakit rabies nyerumba aum pengarang berita International Conference on Agriculture and Agro-based Industry Sarawak 2017, kemari.
Uggah mansutka pekara nya bekaul enggau dawa seiku orang ti kala nyadi pengari rayat ari parti penyakal ti madahka diri enda dituchuk vaksin pengudah diketup ukui.
Taja pia Uggah madahka sida deka mansik sereta beratka semua ripot bekaul enggau kes nya, lalu deka ngenukuka semua kes nya bisi nerima ujian diperesa raban perubat.
“Nya kebuah kami suah meri jaku lalau ngambika rayat bisi pengibuh ba isu tu, iya nya jampat nganjung diri ngagai sepital sereta betemu enggau lutur,” ku iya.
Nambahka nya Uggah madahka komiti iya deka majak chakah nagang penyakit nya ari terus ngerekai ngagai kandang menua bukai.
Seiti ari chara iya nya ngatur pengawa meri vaksin ngagai kandang menua ke bisi igi penyakit nya sereta dalam kandang endur ti 10 kilometer ari kandang menua ke ditemu bisi penyakit nya.
Pekara nya ku iya, udah dikerandauka enggau Menteri Industri Betanam Betupi enggau Bumai Datuk Seri Ahmad Shabery Cheek enggau Ketuai Direktor Opis Servis Veterinar, Datuk Dr Quaza Nizamuddin Hassan Nizam, ti beratika strategi ke benung dipejalaika.
Kelimpah ari nya lebuh ditanya bekaul enggau sekeda orang ti ngerembaika berita bula nengah media rama bekaul enggau penyakit rabies, Uggah madahka pekara nya enda patut nyadi tang ke patut iya nya meri sukung ngagai pengawa mutarka penusah nya.
Nyema orang nya ngumbai kitai bisi ngaga bepilih bulu ngagai iya, aku ngasaika orang ngembuan runding ti enda manah. Datuk Amar Douglas Uggah Embas Sapit Kepala Menteri Sarawak
“Pegawai ari komiti kami udah ngaga ripot ngagai MCMC laban pengawa ti baka nya ukai ulah ke manah, ngenakutka rayat sereta meri penerang ke enda betul.
“Kami begunaka sukung ari se- mua orang mutarka kes tu. Enti bisi meda ukui ke mangah tauka pekara ke bekaul isu tu padah aja ngagai kami. Kitai ngarapka media rama tu dikena mantu mutarka penusah ke benung ditapi kitai,” ku iya.