Hari Inovasi IPG TAR ngangkatka pengelandik nengkebang, inovasyen
KOTA SAMARAHAN: Jabatan Penyelidikan dan Inovasi Profesionalisma Keguruan (PIPK) udah mujur ngatur Hari Inovasi Tahun 2017 renggat IPG Kampus Tun Abdul Razak, apin lama.
Hari inovasi ke diatur ba Dewan Sri Samarahan IPGKTAR, berambaika jaku ‘Inovasi Tunjang Kecemerlangan Organisasi’.
Bejaku ba pengerami nutup program nya, Ketuai Opis PIPK, Dr. Clarence Jerry meri puji ngagai komiti pengatur ti udah ngempuruka semua tim ke bepekit mandangka asil tengkebang enggau inovasyen.
“Hari Inovasi IPGKTAR iya nya platform ke chukup engkeman endur bekunsi penemu enggau chara ti manah kelebih agi chara belajar enggau ngajar, kelimpah ari ngenegap sereta ngemeranka inovasyen.
“Ke sekali tu bisi ngayanka asil penyulut ti nambah ba kualiti utai dipandang, kualiti, pengelandik nengkebang runding enggau inovasyen,” ku iya.
Batang objektif Hari Inovasi 2017 diatur dikena ngangkatka pengelandik nengkebang enggau inovasyen raban IPGKTAR ti nyadi randau akademik, nyendiaka peluang berandau enggau bekunsi penemu ba pengawa ngasilka inovasyen, kelimpah ari dikena meri peransang enggau motivasyen ngagai raban IPGKTAR ngambika majak ngemeran pengawa ngemanahka asil ke ditengkebang.
Nyerumba program tu, program besai ke diatur iya nya pekit ‘Inovasi Pengajaran dan Pembelajaran (PdP) Ke-7’, ti dipasuk 38 tim ke nyengkaum pengelicha enggau pelatih, ti udah nerima sukung ke chukup manah.
Pekit Inovasyen kategori pengelicha ti berebutka Mangku Pusingan Hamsiah udah dimenang begulai entara Tim Jabatan Pendidikan Jasmani dan Kesihatan enggau Tin Pusat Sumber IPGKTAR.
Lalu kategori nembiak dimenang Tim Major Matematik ti betajuk inovasyen ‘ Super ROUNDING Hero’ ti mujur mai pulai Mangkuk Pusingan Rijeng.