Program CWB5 Hope Place Kuching deka diatur ba Sri Aman

BINTULU: Hope Place Kuching enggau Kelab 4x4 Bintulu dalam minggu nyin tadi bisi ngatur pejalai ngagai Sri Aman laban deka berati sekalika bisi raban ti begunaka bantu di kandang menua nya.

Penengkebang Hope Place Kelvin Wan, madahka pengawa tu dipejalai ungkup program ‘Charity Without Border No. 5’ (CWB5).

Ku iya, taun tu raban volunteer deka ngelawa kandang menua Pantu, di Sri Aman, berengkah ari 8 ngagai 10 Disember.

“Kitai deka nyediaka bantu ungkup tiga buah rumah panjai di Pantu, kandang menua Kampung Tabung enggau Kampung Menuang.

“Dikena ngelawa dua bengkah tumpuk pendiau tu ari Pantu, kami deka napi pemar nengah jalai babas,” ku Wan madah ngagai The Borneo Post kemari.

Nya alai, ku iya, ngagai sebarang pengempu kerita 4x4 ti bisi ati ngaul diri dalam pejalai pengawa pengasih tu tau betelefon nuju Allen Ting Tiew Liong ari Kelab 4x4 Bintulu ba lumur 0138401818. Haribulan tembu rejista kena 30 Oktober.

Nitih ku Wan, program CWB5 taun tu bebida ari empat taun ke udah.

“Taun tu, kelimpah ari ngereja pengawa pengasih mantu orang ti begunaka bantu di tiga buah rumah panjai, kami mega deka ngatur latih pengelandik jalai babas kelebih agi ngagai sida ke baru deriba,” ku iya.

Berebak enggau nya, Wan mega minta saup barang pemakai baka berau, garam, gula, minyak makai, milo, mi, ruti enggau kemping. Penerang silik tau betanya ngagai Hope Place Kuching ba lumur 013-5672775.

Hope Place sebengkah Gerempung Ukai Dikuasa Perintah (NGO) ti ngabas sereta mantu raban orang seranta sereta ruang bilik ti kurang benasit di kandang menua ulu di Sarawak kenyau ari taun 2013.

UNGKUP PENGELANTANG PELAJAR: Bala penerima baucher Yayasan Sarawak begulai enggau Rolland (lapan belas kanan, baris belakang) sereta bala bukai.

ARAPKA MUJUR: Wan (tengah) begulai enggau bala kaban Kelab 4x4 Bintulu mandangka diri temegah ati enggau program CWB5.