Dr Chou: Semina vaksin anti-rabies ari JPVS aja tau diambi
KUCHING: Mensia mayuh dilalau semina ngambi vaksin anti-rabies ari lutur veterinar ke direjista tauka ari Opis Servis Veterinari Sarawak (JPVS).
Presiden Gerempung Veterinari Sarawak (SVA) Dr Chuo Hock Tieng madah, vaksin nya semina ulih diambi ari lutur veterinar ti dikemendarka lalu enti sema bisi orang bukai ke nyual ubat nya ba kaunter kelinik tauka farmasi, nya nyadi penyalah ari sukut undang-undang.
“Nengah Ordinan Pengerai Mensia Mayuh Veterinar, 1999 sereta genteran tusun ukum Akta Jelu, 1953, semina lutur jelu aja ke ulih ngereja sereta meri vaksin ngagai jelu, lalu nya kebuah kitai enda ulih meli vaksin ba kaunter aja, iya nya klinik tauka farmasi tauka meri/ nuchuk vaksin nya kediri empu.
“Mensia mayuh ulih ngambi vaksin semina ari klinik veterinari, kelimpah ari servis vaksinasyen ke digaga bebala mayuh ari perintah ti suah digaga.
“Aku mega deka nerangka ditu, vaksin anti rabies berega RM55 di Kuching,” ku iya madah lebuh dikerandau pengudah di intebiu begulai enggau stesyen radio, TEA FM ditu, kemari.
Dr Chou nandu baru madahka, sebedau tu, mayuh ripot ti digaga mensia mayuh madahka sida iya ulih meli vaksin enggau rega RM26, RM29, RM50 sereta mayuh macham rintai rega bukai.
Iya madah, enti vaksin nya baruh rega RM55, reti nya vaksin nya bansa ‘vak- sin enam dalam satu’ ke di ulih sida ke ngempu jelu ari farmasi tauka orang ke ngembuan kebun jelu, ke enda nitihka undang-undang.
“Enti kita meli vaksin ari kaunter klinik tauka farmasi, nyangka kitai diberi penerang ke salah bekaul enggau vaksinasyen, lalu tu deka ngenusahka kita enti kita meri vaksin ke salah, ungkup tuju ke salah,” ku iya.
Kelimpah ari nya, iya ngelalau sida ke bisi nupi jelu nentu tauka nukuka dulu sekalika lutur veterinar nya bisi direjista tauka enda baruh Opis Kunsil Veterinar Malaysia (MVC).
Iya nandu baru madahka, tu laban bisi entara sekeda lutur jelu bansa nya ( ke nadai agi direjista) agi aktif ngereja pengawa sida iya tang enda ngerijista diri empu ba MVC.
“Tu laban tiap iku lutur jelu ngembuan setipikit atur pengawa sida ninting taun (APC) ke enda tau enda digaga baru ninting taun lalu enti enda ngaga baru, sida enda dikemendar bejalaika pengawa nyadi lutur jelu.
“Kami meransang sida ke bisi pemadah tauka enda puas ati ba pekara bekait enggau vaksin tauka lutur jelu, ngeripot ngagai MVC lalu disengkaum enggau bukti baka kad ke bisi udah disain tauka resit vaksin ke dijual orang ke semina deka beambi ulih,” ku iya.
Ku Dr Chou, enti mensia mayuh deka nemu pasal lutur jelu ke udah direjista tauka enda, tauka pemadah bukai, tau ngelawa laman web www. mvc.gov.my.